Shillong, Risaw 09
U Nongïalam ka Liang Pyrshah u Mukul Sangma ha ka sngi Palei u la ong, ka jingkynnoh lum pisa ki pulit ha ki khyrdop kiba beaiñ kam lah ban jia khlem da don kiba pynshlur bad u la dawa ba dei ban leh da kaba tyngeh katkum ka Meghalaya Police Act, 2010.
“Ka Police Act 2010 ka ai bor ban leh da kaba tyngeh mardor pyrshah ïa kino-kino ki ophisar kiba pyndonkam bakla ïa ka bor. Lada uno-uno u ophisar pulit u lah ban leh ïa kaei-kaei ha la ka jong ka mon, kumta kam lah ban long satia lada kam dei ba ïoh ïa ka jingpynshlur nano re nano,” la ong u Mukul.
U la ong ba ïa kum kitei ki jingkynnoh donkam ban leh da kaba tyngeh bad ban phah tohkit da kaba laitluid.
“Kitei ki jingkynnoh ka donkam ban leh da kaba tyngeh bha kaba lait na kano-kano ka jingtuklar da ka kam saiñpyrthei. Hato kan jia lada ka Sorkar ka dang ïai kyntait kaba ju long ruh barabor?” u la buh jingkylli.
U Mukul u la ïaroh ïa ka Khasi Students’ Union (KSU) halor ka jingleit khynra kaba dang shen bad ong ba kane ka jingleh ban peitngor da ka imlang sahlang kala pynlong barabor ïa ka Meghalaya ban long kaba husiar.
U la dawa ba ka jingïalang jong ka State Security Commission (SSC) ka dei ban ïakren halor kane ka jingïasylla.
“Nga la dep shimet nalade ban pasiaw ha u Myntri Rangbah ban lum ïa ka jingïalang jong ka State Security Commission. Ka Sorkar ka dei ban lum ïa kane ka jingïalang shisien ha ka 3 bnai. La katno sien ngi la pynlong ïa ka jingïalang? Kam dei ka kamram ka jong nga ban ïai pynkynmaw ïa ki,” u la ong.
U Mukul u la ong, ka Sorkar ka jong u ha u snem 2010 kala pynmih ïa ka hukum ne ka Executive Order ha kaba la khang pyrshah (ban) ïa ki khyrdop kiba beaiñ ïa ki trok bad dei ban phah bahkhlieh ïa ki DC bad SP.
“Katei ka hukum ka dang treikam haduh mynta. Kum u Symbud Myntri Rangbah u Bah Prestone u la ong, ka hukum ka dang ïeng. Hynrei katei ka hukum kan ym don dor pat lada ym pyntreikam ïa ka,” u la ong.
U la ong, ka jingpynkynriah kam laitlan ka pynkhein ïa ka Police Act bad ka ïapein noh ïa ka jinglong jingman.
“Ki pulit ki dei shi bynta jong ka jingsynshar khadar ban ai ïa ka hok. Kano-kano ka jingïapeiñ ïa katei ka bynta kan don ka jingktah kaba jur bha. Kim lah ban leh hala ka mon ban thung ne pynkynriah kam,” u la ong.
Halor ka jingdawa ban weng kam shipor ïa u SP bad u DC, u Mukul u la ong, “Ka Section 107 bad 108 jong ka Police Act dei ban pyntreikam bad dei ruh ban rekod ïa ka jingkren ne jingpynpaw khnang ba ka jingtohkit kan long kaba khuid bad kaba laitluid ban tip ïa ki bor kiba don na sha lyndet”.
“Kumno kan urlong haba ki bor kiba dei khmih kin ym tip eiei? Hato ki dei kiba kyllut ne matlah? Kam dei kaba la jia tang ha kawei ka surok, ka dei kaba la ïakren ha kylleng ki shnong,” u la bynrap.
