Shillong, Jylliew 25
Ka Khun Hynñiewtrep National Awakening Movement (KHNAM) hapoh ka jingïalam jong u Working President Bah Thomas Passah ka la leit ban mudui da ka ejahar ha ka Sngi Ba-ar pyrshah ïa u nongïasaid aiñ bad uba dei ruh u nongïalam jong ka seng saiñ pyrthei ka Bharatiya Janata Party(BJP), u Ashwini Uphdyay.
Ka jingleit mudui jong ka KHNAM da ka ejahar pyrshah ïa une u nongïalam ka BJP ka dei halor ka jingkynnoh ba une u nongïalam ka BJP u la ïalam bakla ïa ki paidbah bad ïa ka jylla Meghalaya da ki jingkynnoh ki bym don nongrim.
Ïa katei ka ejahar la mudui ha ka shlem treikam jong ka Cyber Crime Shillong. Ha kane ka ejahar ka KHNAM ka la pyntip ba une u nongïalam ka BJP, u Ashwini Updhyay lyngba ka dur khih ba la pynsaphriang ha kylleng ki rynsan ‘social media’ u la kynnoh ba ka jingsynshar hapoh ka jylla Meghalaya kam long shuh kaba khuid bad babha namar la synshar da ka niam bad ki nongïalam niam.
Ka KHNAM ha ka ejahar ka la pyntip ba u Ashwini Updhyay u la kynnoh ruh ba ki nongthaw aiñ bad kiba don ha ka sorkar kim treikam eiei hapoh ka jylla Meghalaya.
Halor kane na ka liang u Bah Passah u la ong ba katei ka dur khih ka la saphriang ym tang hapoh ka jylla Meghalaya hynrei wat hapoh ka Ri India baroh kawei kaba lah ban ïalam bakla pat ïa ka jingmut jingpyrkhat jong ki briew napoh ri-thor shaphang ka jinglong-jingman jong ka jylla Meghalaya.
U Bah Passah u la ong ba hadien ka jingsngap ïa katei ka dur khih ba la kren da u Ashwini Updhyay ka la long kaba ïalam bakla shaba palat ïa ki paidbah ha kaba u la ong ba ïa ka jylla Meghalaya kam don shuh kata ka jingsynshar kaba khuid bad kaba bha la ka long da ki nongïalam, ki bor synshar ne wat da ka ïingbishar ruh bad ba kine baroh ki jingsynshar ki lah dkoh lut.
U Bah Passah u la ong ba utei u nongïalam ka BJP u la kynnoh pylleiñ ba ïa ka jylla Meghalaya la ïalam da ki ñiam bad ki nongïalam ñiam khristan.
“Kane ka dei kaei-kaei kaba ïalam bakla bha bad kum ban shu pynkynmaw ba ha ki khyndiat por ba lah dep, ngi la ïohi ba na ka liang u Myntri Rangbah ka Assam ruh, u la shim ïa kine ki kyntien ha kaba u la ong ba ka jingrem jong ka BJP-NPP ha kane ka MP elekshon kaba lah dep ka dei namar ba ki kynhun balang bad ki nongïalam ñiam jong ngi, ki la pynlong ka jingïalap elekshon paidbah pyrshah ïa ka BJP”, la ong u Bah Thomas.
U la ong ba kum kine ki jait jingkren ba la kren da ki nongïalam ka BJP ki long kiei-kiei kiba ïalam bakla ïa kiwei pat.
Shuh shuh u Bah Passah u la ong ba hadien ka jingkren jong u Myntri Rangbah ka Assam, u Himanta Biswa Sarma pyrshah ïa ki kynhun balang bad ki nongïalam ñiam jong ka jylla Meghalaya hynrei watla ka la don ka jingkhmih lynti ba kum u Myntri Rangbah ka jylla, u Conrad K. Sangma un ong eiei halor kane ka jingkren jong u Myntri Rangbah ka Assam hynrei ka long pynban kaba lehraiñ bad kaba sngewsih haduh katta-katta ba u Myntri Rangbah ka jylla jong ngi, u la shu sngap jar halor kane ka jingkynnoh jong utei u Myntri Rangbah ka Assam.
“Kane ka jingsngap jar jong u Myntri Rangbah jong ngi, ka ailad sa ïa kum kine kiwei ki briew ban dang pynthohbria shuh-shuh ïa ka jinglong-jingman hapoh kane ka jylla jong ngi”, la ong u Bah Passah.
Na ka liang ka Cyber Crime ka la shimkhia halor kane ka kam bad ka la pyrshang ruh ban phah weng noh ïa katei ka dur khih ba la kren da u Ashwini Updhyay.
U Bah Passah u la ong ruh ba na ka liang ka KHNAM kan sa leit ban ujor da ka ejahar ha thanat Lumdiengjri khnang ba kan don ka jubab halor kane ka kam namar ban shu ap khmih lynti na ka tnad Cyber Crime ba kan leh eiei khlem da ujor da ka ejahar ha ka tnad pulit, ïoh lehse kane ka kam kan ym poi sha kaba kut.
”Ngi khmih lynti ba na ka liang ka sorkar kan pyrkhat noh bad ngim tip katno tylli ki dur khih kiba la saphriang sha baroh kawei ka Ri India ba lah ne em ban weng noh ïa kita. Ka long kaba eh namar ki lah poi ha ki mobile phone jong baroh”, la ong u Bah Thomas.
U Bah Passah u la ong ba kum ka seng ka dawa ba na ka liang jong ka sorkar jylla khamtam u Myntri Rangbah ka jylla u dei ban ai kawei ka jingthoh kaba shai halor kane sha ka sorkar India ban pynshai sha baroh kawei ka Ri India ba ki paid ka jylla Meghalaya ki dei kiba ïaid katkum ka ri synshar paidbah bad ki kynhun niam ki don ïa la ka jong ka bynta ha kaba kim don ka jingtuklar ha ka synshar-khadar hynrei ka sorkar ka dei kaba peit ba khmih ïa ka synshar ka khadar khnang ba ka jingkren ba kan ka jingpynshai ba kaei kaba la kren da utei u nongïalam ka BJP na Allahabad ki dei ki jingkren kiba lamler bad bakla.
