Nongstoiñ, Naitung 10
Ha ka sngi Thohdieng jong ka taïew, shi bynta ban pan jingkyrshan ïa u kyrtong u ban ïakhun ïa ka ilekshon shiteng samoi sha ka Lok Sabha, ka National People’s Party (NPP) Mawshyn-rut Block, kala pynlong ïa ka jingïalang paidbah ha ïew Riangdo, Maw-shynrut Constituency.
Ha katei ka jingïalang ïalap ilekshon ïa u kyrtong ka NPP u Dr. DRL Nonglait la donlang ruh u Myntri ka Sorkar Jylla Bah Wailadmiki Shylla, u MLA ka Mawhati Bah Charles Marngar, Bah Hamletson Dohling, Bah HM Shangpliang, Bah Gigur Myrthong kiba dei ki MLA barim bad kiwei-kiwei ki nongkitkam bad ki nongkyrshan jong ka seng nalor kiwei-kiwei.
U Bah Wailadmiki Shylla haba ai jingkren ha ka jingïalang u la ïaroh ïa ki kam bakhraw jong ka Sorkar ha kaba ka la theh da ki phew klur ki kam pynroi hapoh ka dong ka thaiñ Mawshynrut bad u la ong ruh ba hooid um ong ba kala biang lut bad dang bun ki jingduna hynrei ka Sorkar kan nang ïaleh ban thaw lad na ka bynta ka bit ka biang jong u paidbah ka Jylla hi baroh kawei.
U Dr. DRL Nonglait pat haba kren ha ka jingïalang u la ong ba lada mynta ka kynti ki paidbah kin jied ïa u kum u MP, un leit sha Parliament ban ïasaid bad ïa syllok bad ki ophisar jong ka Ministry of Home Affairs, kumta ki paidbah ki dei ban long kiba stad ban jied ïa ki nongmihkhmat bad u shaniah ha ka jingstad jong ki paidbah.
Shuh shuh u la ong ba ka kam jong u ka long ban eksamin ïa ki nongthoh eksamin ban pynshong dor bad ban ai marks ïa ki khynnah pule hynrei ha kane ka por u dei u nongshah eksamin bad ki paidbah ki dei ki nonghikai bad kumta u shaniah ha ki paidbah katno kin ai marks ïa u ha kane ka eksamin ne ka ilekshon MP bad u da kyrmen ruh ba un ïoh distinction bad 80 na ka 100 na ka Mawshynrut Constituency u kyrmen skhem ban ïoh beit.
U Dr. DRL Nonglait u la ong ruh ba hashwa ba un rung sha ka NPP u la da thew da woh bad pynhap sawar bha ïa ka jingtreikam jong kane ka Sorkar.
“Nga nud ban ong ba ka dei ka Sorkar kaba treikam bad shibun ki kam pynroi bad kaba donkam ka long ban wan shakhmat ban ïathuh ïa ki jingeh jong ki paidbah bad ruh ban ïatreilang bad ka Sorkar,” u la ong.
Shuh shuh u la bynrap ruh ba ki nongmihkhmat bad ki paidbah ki dei ban wan shakhmat ban ïathuh ïa ki jingeh sha ka Sorkar bad ym da dei eh ha ka dur jong ka jingïabeiñ ïa khoh hynrei ban kyrpad ïa kiba don ha ka bor ban weng ïa kita ki jingeh.
