Shillong, Naitung 10
Ka kshaid Kynrem kaba don ha surok na Sohbar sha Mawlong, Shella ka la long kawei na ki kshaid kaba la khring ïa ki nongjngohkai kai pyrthei ym tang napoh ka Jylla hynrei wat nabar ka Jylla bad ruh nabar ri.
Kane ka kshaid kaba don ha ka shnong Umwai ka long shisha kaba itynnad haduh katta-katta khamtam lei ha ka por ba hap slap bad heh um. Lah ban ïohi ïa ka um kaba hap nalor ki lum maw kaba long ïasyriem thik kum ka ‘dud’.
Haba hiar sha kane ka jaka, lah ban ïohi ba ka jingkhring jong kane ka kshaid kam dei tang namar ka jingitynnad bad heh rymphum hynrei ka dei ruh ba kum ki nongwan kai, ym tang ba ki ïoh ban peit bad shondur hakhmat jong kane ka kshaid hynrei ki ïoh ruh ban mad ïa ka um kshaid kaba hap najrong bad bad her shaduh jingkieng ïaid kali, kaba pynlong ïa ki paidbah ban ïalehkmen bad shad bad ka um na kane ka kshaid.
Ka thaiñ Sohra ka la dei lypa kawei na ki thaiñ kaba la bna nam ha kylleng ka pyrthei namar ka jingdon ha ka ïa ki jaka kum ki lum ki wah, ki kshaid kiba itynnad bad kiwei-kiwei kiba la khring ïa ki briew na kylleng ki bynta jong ki Jylla ka ri bad ruh wat na ki ri jong ka pyrthei.
Ka jinghiar jong ki nongjngohkai pyrthei sha ki thaiñ Sohra ka long shisha kaba jur bha bad ym dei tang ha ki sngi kiba ka bneng ka shit bad shai kdar hynrei wat haba ther u lapbah lapsan ruh, ki nonghiar ki bun bha, kata ka long ba ki kwah ruh ban mad ïa ka jingshem jong ki ïa ka jinglong jong ka thaiñ ha ka aiom slap.
Haba phai sha ka kshaid Kynrem, la ïohi ba watla ka don ka jinghap jong u slap bad jingtap jong u lyoh hynrei kane kam pynduh lad satia ïa ki nongleit kai ban ïoh peit ïa kane ka kshaid kaba noh rymphum ym kum kiwei pat ki kshaid, kiba hap ban peit kham najngai bad tang dum lyoh, ym ïohi eiei shuh hynrei tang u lyoh ba dum.
