Shillong, Naitung 10
U Myntri ka tnad kam jngohkai, u Timothy D Shira ha ka sngi Thohdieng jong ka taïew u la ong, ba ka jingthmu jong ka Sorkar ban buh jaka bam lane ka Food Court ha Umling Ri-Bhoi District, kadei ban ai jaka shongkai ïa ki nongwan shangkai pyrthei (Tourist) ha ka por ba ki dang shah talasi ne pynrung kyrteng ha ka Tourist Registration Centre.
Haba kren sha ki lad pathai khubor u Timothy u la ong ba ka jingthmu jong ka tnad kam jngohkai, kadei ban don ki kamra pyndonkam ïa ki nongwan shangkai pyrthei (Tourist) bad ka Tourist Registration Centre ha Umling.
U Timothy u la ong, ba nalor ka jaka bam lane ka Food Court, kin don ruh 2 tylli ki kamra na ka bynta ka jingpyndonkam jong ki Ophisar ka tnad kam jngohkai, ki ban pynrung kyrteng lane talasi ïa ki nongwan shangkai pyrthei (Tourist), kiba hap ban wan shuwa sha kane ka jaka hashuwa ban rung shapoh ka Jylla Meghalaya, lada ki wan na Ri-Bhoi District.
“Ka jingthmu jong ngi ka long, ban don 2 tylli ki kamra ban leh ïa ki kam ophis ban pynrung kyrteng ïa ki nongwan shangkai pyrthei (Tourist) bad ha ka por ba pynrung kyrteng katto-katne por yn shim por, kumta ha kata ka por ki nongwan jngohkai ki donkam ban bam ne shongjah thait bad dei namar kata, ngi la mang ban buh ka jaka bam lane ka Food Court ha Umling Ri-bhoi district” la ong u Timothy.
U Timothy ula ong ba Tourist Registration Centre, kan long kum ka Inner Line Permit (ILP) kumba la leh ha kiwei ki Jylla, kum ha Nagaland ha kaba ki briew kiba rung sha katei ka Jylla, ki donkam ban pynrung kyrteng ïalade.
U la ong ruh ba ka jingdonkam ban don ïa ka Tourist Registration Centre, kadei namar ba teng-teng ym lah ban tip, la ki briew ki wan sha Meghalaya kum ki nongwan shangkai pyrthei (Tourist) ne ki wan ban leh kam sniew ha ka dur jong ki Tourist.
“Kumta ngi sngew ba ka long kaba donkam ïa ngi ban bishar bniah ïa ki kot ki sla jong ki, la ki dei shisha ki nongshong shnong bashisha jong ka ri India ne ki wan na kiwei pat ki ri bad lada kumta ki don ne-em ïa ki kot ki sla kiba biang” u la ong.
U Myntri u la pyntip ruh ba ka tnad kam jngohkai ka don ïa ka Tourist Registration Centre ha Rilum Garo Hils, kata ha Berubari bad ha kane ka jaka ruh ka don ka jaka bam bad ka jaka shongthait na ka bynta ki nongwan shangkai pyrthei kiba dang pynrung kyrteng ha ka Centre.
Haba ïadei bad ka jingpyrshah ka Khasi Students’ Union (KSU), u Myntri u la ïathuh ba na ka liang ka ophis Deputy Commissioner (DC), ka la dep ban ïakren bad ka KSU bad ka la kyrpad ruh ban nym pynthut ïa ka kam ba dang pyntrei.
