Shillong, Naitung 10
Ki nongshong die madan ba ha ki rud surok kiba don hapoh ka shatri jong ka Meghalaya & Greater Shillong Progressive Haw -kers and Street Vendors Association (MGSPHSVA) ki la tur paidbah ha khmat ka ophis Shillong Municipal Board ban pynpaw ïa ka jingdawa jongki ban thaw noh ïa ka Town Vending Committee ba pura.
Ha kane ka jingleit tur ki spah ngut ki nongshong die madan ba na ki thaiñ Motphran, GS Road ter- ter shaduh Ïew Mawlong ki la rah ïa ki jingthoh bapher-bapher ha ryngkat ki kyntien pynrem ïa ka ophis Municipal bad ïa u Chief Executive Officer (CEO), kumjuh ruh kaba ki la kynnoh ba ka Provisional Town Vending Committee (PTVC) ka treikam katba mon.
Haba ïakren ïa u Bah Shane Thabah u ba long u dkhot ka PTVC bad uba long ruh u Asst Secretary ka MGSPHSVA u la ong ba ïa ka PTVC la shu thaw khlem da don kano-kano ka ilekshon bad ka jingdawa jongki mynta dei ban thaw ïa ka Town Vending Committee (TVC) kaba pura.
Shuh-shuh u la ïathuh ba katkum ka aiñ kane ka PTVC ka por treikam jong ka kan dei tang shi snem, hynrei 3 snem mynta ka jingpyntreikam ïa kane ka komiti la shu ïaid lait na ki kyndon jong ka aiñ, namar kata ka la dei ka por ba ka Municipal kan thaw noh ïa ka TVC kaba pura bad ban leh da ka ilekshon khnang ba kan long kaba shai bad ba kiba shah jied kin dei kiba ki paidbah hi ki la jied.
U Bah Thabah u la kynnoh ba ha kane ka komiti kaba don mynta, ka jingïakren ha ka jingïakynnoh ka long da kumwei bad haba mih kino-kino ki rai ki mih da kumwei, u la ong ba kane ka pynsngewsih shibun ïa kiba shongdie madan.
Hadien katto katne por ka jingïakhih, u Executive Engineer (EE) jong ka Municipal u Bah FB Chyne u la khot ïakren ïa ki nongïalam ha kaba u la kyntu ïa ki ban pynkut noh ka jingïakhih jongki, kaba khlem ai jinghun satia ïa ki nongshong die madan.
Shuh-shuh u Bah Thabah u la kynnoh ba ka Municipal ka shu pyndonkam ïa ki nongshong madan tang kum ki dkhot ka PTVC katba ïa kano-kano ka rai la shim rai marwei.
U la ban jur ba ka MGSPHSVA ka dawa beit ïa ka ophis Municipal ba ka dei ban thaw noh da ka TVC kaba pura kaba ïaid da ka ilekshon khnang ba ka jingtreikam kan long kaba khuid ba suba bad lada ka ophis kam sngap ïa kane, ki la shim beit ïa kawei ka rai ban ym shongthait ban pynlong ïa ki jingïakhih.
