Ngi la dep mad ïa u kyrtong ïamonlang ka khlem seisoh, ka UDP ka hap ïaid marwei: Titos

Shillong, Naitung 10

U General Secretary ka UDP Sengkmie Bah Titosstarwell Chyne u la ong ba ka UDP ka la dep mad ban sei ïa u kyrtong ïamonlang (common candidate) ka bym shym la poi shaei-shaei dei na kata ka daw ka UDP ka la hap ban sei hi la u jong u kyrtong ha kane ka ilekshon MP Lok Sabha shiteng samoi.

Kane ka jingpynpaw u Bah Titos Chyne ka dei namar ka HSPDP kaba ïatreilang ha ka Regional Democratic Alliance kam treh ban kyrshan ïa u kyrtong ka UDP kaba la sei ban ïakhun ha kane ka ilekshon MP shiteng samoi.

U Bah Titos u la pynpaw ka jingsngewsih namar ba ka HSPDP kam shym la kyrshan ha kane ka ilekshon hynrei ka UDP ka hap ban pdiang namar kane ka seng ruh ka don la ka jong ka jingmut.

U la batai ba ka UDP ka don 12 ngut ki MLA bad bun ngut ki MDC, ka eh palat ban pynïeng ïa u kyrtong ïamonlang bad dei na kane ka daw ba ki la rai ban sei beit da u kyrtong ba ka don da ka lama jong ka Bom.

Haba kylli la ka don ne em ka jingktah haba ka HSPDP kam kyrshan ha kane ka ilekshon, u la ong ba ka UDP mynta ka la ïaid shaid-shaid ban pynkhlaiñ ïa la ka jong ka seng wat ha ki constituency ki bym don ki MLA ruh.

U la ïathuh katba dang slem ka tarik ban pynbna ïa ka sngi thep vote ka UDP ka dang ïoh bor namar ka dang lah ban leit pynshai ïa ka kyrteng u Bah VG Kynta uba dei u kyrtong ba ka UDP ka sei mynta.

Shuh shuh u la ïathuh ba ha ka 14 tarik mynta u bnai ka UDP kan pynlong ïa ka jingïalang paidbah ha Nongpoh na bynta ka Ri-Bhoi.