Shillong, Naitung 10
Ki nongshong die madan ha Motphran ki la pynpaw ïa ka jinglyngngoh haba ïadei ka jingthmu pynkynriah ka Shillong Municipal Board (SMB) ïa ki sha basa die sohsaw bad ba u Syiem ka Hima Mylliem um don jingtip eiei ïa kane.
Haba ïakren ïa u Bah Onessimoss Mylliem Umlong uba dei u nongshong die madan ha Motphran u la ïathuh ba ka kynhun ki nongshong die madan ha Motphran ki la leit ban pan jingshai na u Syiem ka Hima Mylliem ïa ka jingthmu pynkynriah ka Municipal, hynrei kaba lyngngoh ka long ba u Syiem bad ka Executive Committee jong u ka khlem don jingtip eiei.
“Kumno ka lah ban long ba tang ka Sorkar bad ngi kiba shong die madan ban tip bad ban shu pynkynriah khlem ka jingïohbor lane ka jing-kynjoh ktien ïa u Syiem jong ka Hima Mylliem” u la ong.
Shuh-shuh u Bah Onessimoss u la ong ruh ba ka Municipal ka la dei ban phah da ka jingthoh sha u Syiem ban pyntip ba kan pynkynriah ïa ki nongshong die madan ha Motphran sha basa sohsaw, u la kynnoh ba kane ka rukom leh ka dei ka jingleh sop-sop jong ka EC barim bad kaba mynta jong u Syiem, “Ngi kyrpad ba u Syiem u dei ban don jingtip ha kaba ïadei bad ka Motphran, ym dei ban shu ïaid lyndet, wat ong ba phi don ha ka bor phi shu leh katba mon bad kane kaba ym lah ban long lano-lano ruh” u la ong.
U Bah Onessimoss u la ïathuh ba na ka liang ki nongshong die madan ha Motphran ki la leit buh da ka jingthoh sha u Syiem bad kyntu ba ym dei ban shah ban pynkynriah ïa kiba shong die madan ha Motphran, da kaba kdew ba ka dei ka ïew ba la long lypa (Heritage Market) bad ym lah ban pynkynriah ïa kaba la pynskhem katkum ka Regulation Act 2014.
Kumta ki la kyrpad ïa ka Sorkar ba ka dei ban ïaid katkum ki kyndon jong ka aiñ, ym ban shu leh donbor katba mon tang namar ba don ha ka bor bad ban jur ba ka Sorkar ka dei ban ïatreilang bad ka Hima ha ki jaka kiba dei jong ka Hima, “Ngin ym kynriah, ngin ym pdiang da lei-lei lada khlem ka jingwan peit wan khmih u Syiem jong ka Hima” ki la ong.
