Shillong, Jylliew 25
Ki arngut ki MP Lok Sabha na Meghalaya kiba dang shu shah jied shen u Dr Ricky Andrew J Syngkon bad u Saleng A Sangma ki la bam smai kum ki MP ha ka Sngi Ba-Ar ha Dorbar Lok Sabha.
Kine ki arngut ki la bam smai ha ka ktien English. U Dr Syngkon u dei u MP uba la shah jied na Shillong Parliamentary Constituency na ka seng Voice of the People Party (VPP) katba u Saleng u dei uba la shah jied na ka Tura Parliamentary Constituency na ka seng Congress.
Ha ka por ba u Saleng u la bam smai u la bat lang bad ka Riti Synshar lane ka ‘Constitution’ jong ka Ri ha la kti bad ha kaba kut jong ka jingbam smai u Saleng u la ong ïa kine ki kyntien: ‘Save the Constitution’ lane ïada ïa ka Riti Synshar.
Lah ban kdew ba jan baroh ki MP na ka liang pyrshah ki la rah da ka Riti Synshar ha la kti naduh ka Lah Sngi U Blei kaba long ka sngi sdang jong ka Dorbar Lok Sabha kaba 18. Ka jingrah jong ki ïa ka Riti Synshar ka long kum ka jingai khubor sha ki nongshong shnong ba kane ka Riti Synshar ka don hapdeng ka jingma namar ka jingsynshar jong ka BJP.
Na ka liang u Dr Ricky pat haba pynkut ïa ka jingbam smai u la pyndonkam ïa ki kyntien “Khublei Shibun” bad “Mitela”. Ka kyntien “Mitela” ka mut khublei Shibun ha ka ktien Garo.
Kane ka dei ka sien banyngkong ïa kitei ki arngut ban shah jied sha ka Dorbar Lok Sabha.
