Shillong, Jylliew:
Ka HCLFoundation kaba pynïaid ïa ka Corporate Social Responsibility (CSR) bad ïa ki mat jong ka Kompani teknoloji ba la paw jong ka pyrthei ba la tip kum ka HCLTech ha India, ka la pynlong ïa ka HCLTech Grant Pan-India Symposium 2024 kaba saw ha North-Eastern Hill University, Shillong, Meghalaya, halor ka matpdeng ‘Ka bynta jong ka CSR ha ka roi ka par ha ki jaka ba kyndong jong ki jylla Shatei-lam-Mihngi jong ka Ri India’.
Da ka jingthmu ban pynkhlaiñ ïa ka roi ka par kaba neh ha ki jaka ba kyndong jong ka Ri, ka HCLTech Grant Pan-India Symposium ka ai ïa ka rynsan ïa ki kynhun ba don jingthmu ban trei ha ka imlang-sahlang, kynthup ïa ki sengbhalang, seng treimon sngewbha, ki ba trei na ka bynta ka imlang-sahlang bad kiwei kiwei, ban ïatreilang bad ban ïa ai jingmut mar kylliang ïa ki buit treikam bad ki jingïasngewthuhlang.
“Ka thong ba khraw jong ngi ka long borabor ban noh synñiang sha ka roi ka par jong ka imlang-sahlang kaba ngi shong ngi sah bad ka HCLTech Grant ka dei ka lad ba ngi ai ka jingïatreilang ryngkat bad ki seng bhalang, Seng treimon sngewbha ba la tip kum ki NGO da kaba ngi don ka juh ka thong. Ka Symposium (ka jingïalang) ka la pynshisha ba ka long kaba kongsan tam bad ka la ai ka lad ïa ngi ba ngin ïa kynduh ïa ki NGO bapher bapher ban ïathir, ïatai ïa ki mat ba jwat bad kiba donkam. Sha lyndet kine ki Symposium, ngi da kmen palat ban ïohi ba ki NGO ki phah ïa ki jingmut na ka bynta ka HCLTech Grant bad ban ïatreilang bad ki ban wanrah shibun ki jingkylla ha ka imlang-sahlang,” la ong U Dr. Nidhi Pundhir, Vice President, Global CSR, HCLTech bad u Director, HCLFoundation.
Ka HCLTech Symposium 2024 ka don jingmut ban wanrah ïa ka jingkyrsiew jong ka HCLTech Grant hapdeng ki NGO bapher bapher. Ka Edition 10 jong ka HCLTech Grant India kan ai ïa ka fund kaba T..16.5 Klur (2.2 Million Dollar) sha ki 9 tylli ki NGO, kiba shah jied lyngba ka jingpynïaid kaba khlaiñ,ba shai bad ba long laitluid kumba ju leh ha ka rukom synshar paidbah. Lai tylli ki NGO kin ïoh mar T.5 Klur na ka bynta ki Project jong ki kaba saw snem ha ka liang ka jingkoit-jingkhiah (Health), ka Pule puthi (Education) bad ka Mariang (Environment). Bad hynriew tylli ki NGO kin ïoh ïa ka Grant kaba T.25 Lak na ka bynta ki project kaba shi snem.
