Shillong, Jylliew 25
U Working President ka Khun Hynñiewtrep National Awakening Movement (KHNAM), Bah Thomas Passah u la ong ba ka kamram ban pynkhlaiñ ïa ki kam saiñ pyrthei jong ka seng ka shong ha kti ki paidbah namar dei ma ki, ki ban jied ïa ki nongmihkhmat.
Haba kren halor ka jingpynkhreh jong ka seng ïa ka ilekshon ban wan sha ka Khasi Hills Autonomous District Council (KHADC), u Bah Passah u la ong ba ka seng ka la ïaid mynta la 2 snem kum ka jingpynkhreh ïa ka ilekshon bad ki la don ruh kiba pan tiket.
“Ïa ki kyrteng la phah beit sha ka State Election Committee (SEC) ka ban sa khmih bniah pat ïa ki. Kiba wan pan tiket ki la don na kumba 13-14 tylli ki konstitwensi,” u la ong.
Ha kajuh ka por, u la ong ba ha kane ka kynti, ka seng kan kham phai khmat sha ki ‘riew thymmai bad kito kiba don ka jingsngewkhia ïa ki mat bapher-bapher jong u paidbah.
U la ïathuh ruh ba haduh mynta, ki la don kumba 19 ngut eiei kiba la wan pan tiket na ka seng.
Haba kdew ba ka KHNAM ka la dap 22 snem, u la ong ba kam dei ka seng kaba shong kli kti, hynrei kaba kren bad mih shakhmat halor ki mat ki jura bapher-bapher ym tang ha ka por ilekshon hynrei wat ha bym don ilekshon kumjuh.
Haba pynsngew ba ka seng ka wad ïa ki kyrtong kiba lah ban shaniah bad ki ban shakri hok, u Bah Passah u la ong ba kum ka seng, ka wah ban pynkhie im biang ïa ka District Council.
“Ngi donkam ïa kito kiba don ka mon ba jwat bad lada ki thrang shisha, tang hapoh 6 bnai, la lah ban wan jingkylla ha KHADC bad kumta ngin hap bishar bniah ïa kiba pan tiket na ka seng,” u la ong.
U la ban biang ba ka nongrim jong ka seng ka long pynkhlaiñ ïa ka KHADC bad ban ai ka jingshakri kaba paka tam lyngba ka Khyrnit ba 6.
Haba jubab, u Working President u la ong, “Ka kamram ban pynkhlaiñ ïa ka seng ha ki kam saiñ pyrthei, ka shong ha kti ki paidbah naba dei ma ki ki ban jied ïa ki nongmihkhmat.”
Na ka liang u Bah Passah u la kren shai ruh ba ka seng kan ym pynïeng kyrtong na JHADC ha ka ilekshon MDC ban wan, hynrei kan pynleit jingmut beit thik tang hapoh KHADC.
