Shillong, Jylliew 25
Ha kawei ka jingjia bad katkum ka jingtip ba la ïohlum na ki pulit ha ka Sngi Ba-Ar la ong ba u Rangbah Shnong ka Thadmukoh, West Jaiñtia Hills, u la ai jingtip da ka ktien sha ki pulit halor ka jinglap ïa ka metïap jong uwei u briew hajan ka ïing sah jong u ha Thadmukoh.
Katkum ka jingtip na ki pulit, la ong ba utei u briew uba la khlad u dei uba la tip kyrteng kum u Sam Lyngdoh. Ha kaba ïadei bad kane ka jingjia, uwei u nongshong shnong ïa uba la tip kum u Kyrmen Lyngdoh u la ai da ka jingujor sha ki pulit ha kaba u la kynnoh ba utei u briew uba la khlad, u Sam Lyngdoh, u la shah pynïap ha la ka jong ka kurim ïa kaba la tip kyrteng kum ka Sanli Lamare.
Ha kawei pat ka jingjia, ki pulit ki la ïathuh ba ka Kong Hamlen Sukhlaiñ ka la ujor ba ha ka 22 tarik Jylliew ha ka por kumba 3:30 nohphai sngi, ka la lap ba ki runar ki bym lah ban ithuh ki la prong sha ka ïing sah jong ka kaba don ha Sutnga Mission ha East Jaiñtia Hills, bad ki la tuh ïa ka pisa kaba don T. 50,000 ryngkat bad ki ksiar ki ksah ba shongdor kumba T. 4.5 lak.
Shuh shuh ha kawei pat ka jingjia, ki pulit ki la ong ba u Thangkhanlal Lupho u la ujor ba ha ka miet jong ka 21-22 tarik Jylliew, ki runar ki la tuh ïa ka thuk-thuk (MN-01AM-9968) na ka ïing sah jong u kaba don ha Fire Brigade, Motinagar, Shillong.
Nalorkata, ha kawei pat ka jingjia, ki pulit ki la pyntip ba ki la ïoh khubor ha ka miet jong ka 22 tarik Jylliew ba ki nongshong shnong ka Jebalgre, South West Garo Hills, ki la ïoh bat ïa arngut ki briew ïa kiba la tip kyrteng kum u Sengranfield D Shira, 27 snem ka rta, bad u Tomash T Sangma, 40 snem ka rta, katba ki dang pyrshang ban tuh ïa ka umphniang Diesel na uwei u Mobile Tower.
Ki pulit ki la ïathuh ba ha ka jingtohkit, ka la paw ba kitei ki arngut ki la shah bom shah tied ha ki nongshong shnong bad ki la mynsaw. Nalorkata, ki pulit ki la lap ïa artylli ki ‘Gallon’ kiba don 20 litre ka umphniang Diesel, san tylli ki ‘Gallon’ ba thylli, artylli ki Mobile Phone, bad kawei ka kali Maruti Car (AS-16-4745). Ïa kitei ki arngut kiba la mynsaw la pynkit noh sha Civil Hospital, Tura ban ïoh jingsumar.
