Shillong, Jylliew 25
Ki bahaïing hasem ki la ïoh ban ïalam noh ïa ka Kong Ranjita Lyngkhoi (40 snem) sha shnong Sakwang, South West Khasi Hills District ha ka 24 tarik mynta u bnai (Jylliew) hadien ba ka khun kaba la shah sumar ka la mih noh ha kane hi ka sngi.
Ka jingïoh mih noh kane ka khun kynthei (12 snem) ka dei hadien ba ka la ïoh bor na ka jingshitom kaba ki doktor jong ka Nazareth Hospital Shillong ki la ïoh ban pyllait noh ha ka por 6:00 baje janmiet.
Haba buddien ïa kane ka jingjia kaba sngewsynei kaba la wan jia ïa kane ka longïing, la ïoh ban ïakren bad u Bah Poland Sohphoh uba dei bahaïing jong kane ka longkmie bad pyntip ba ïa kane ka longkmie la ïalam noh sha ïing lem bad ka khun hadien ba ka la mih na hospital.
U la pynkynmaw ha ka por ba kane ka longkmie ka la jah dangstep phyrngab na hospital jong ka 22 tarik mynta u bnai, ha ka por 7 baje janmiet ki thuk thuk bad ki scooty jong ki paralok kiba don kumba 15 tylli ki la ïarap ban leit shang kylleng ka sor bad khapsor haduh Mawngap, Mawïong, Mawdiangdiang, Sohryngkham ban leit wad ïa kane ka longkmie.
“Haba baroh ki thuk thuk ki la wan poi biang ha hospital ha ka por 12:00 baje shiteng synñia haba kim lap shuh, ngi la ïa mutdur ba ka la ïap ne lada ngi lap ngin tam beit ïa ka metïap, ngi khlem poi pyrkhat ba kan dang im biang” u la ong.
U la ïathuh biang ba ha ka Sngi U Blei haba ki la wan na ka jingïaseng katba ki dang dihsha la don ba pyntip ba ïa kane ka longkmie la lap na Wahumkhrah, hangta la nang pynkyndeh ka mynsiem namar baroh ki dang mutdur ba ki lap na ka wah.
U la ïathuh haba ki bahaïing ki dang leit shim shabi na ka hynmen haba ka dang leit sha Ganesh Das Hospital, Lawmali mar kumta ki lap ha lynti katba ka dang ïaid marwei.
U Bah Poland u la pyntip ruh haba ki bahaïing ki lap ïa kane ka longkmie ki la tan jubor hynrei ha kaba nyngkong ka dang ïakhun, hynrei da ka bor shynrang ki la thep ha kali ban kit beit sha ïing ban pynsum, pynsyaid ding bad aibam namar ka khlem bam ar sngi shi miet.
“Ngi shu mutdur ba kane ka longkmie ka mih na jaka ba ka sahmiet na nala namar ha ka por 3 baje duna janmiet haba ther u slap namar la ithuh ïa ki kjat ki la leit haba ka la shong hajan ka wah” u la ong.
U la pynpaw ka jingsngewkmen haba ka briew ka la kylla dur hynrei ki ksiar ha shkor ki don beit.
