Nongpoh, Jylliew 25
Uwei u rangbah briew ba la 29 snem ka rta, uba la jah klep na la ïing naduh ka janmiet jong ka Lah Sngi U Blei, la lap noh ïa ka met ïap da ki bahaïng bad ki nongshong shnong kiba leit wad mynta ka sngi ha kawei ka khlaw jong ka shnong Lumshnong Tyrso kaba la sdien ldui ha kawei ka tnat dieng.
Katkum ka tyllong khubor na ki pulit, la ïathuh ba utei u Rangbah ba la tip kyrteng kum u Teibor Mangu na ka shnong Tyrso Pdeng, u dei uba don jingduna ha ka bor pyrkhat pyrdaiñ naduh ka rta dang rit. La ïathuh ruh ba utei rangbah, u la pyndonkam da u tyllai plastik ban phasi ïalade ha katei ka khlaw.
Hadien ka jingwan poi jong ki pulit ka Mawlasnai Outpost, ïa ka met jong utei u rangbah, la pynkit noh sha Nongpoh Civil Hospital na ka bynta ban pyndep ïa ka post-mortem. Na ka liang ki bahaïing hasem, ki la buh ka jingkyrpad ban pyllait na ka post-mortem naba kim don satia kano-kano ka jingsuba sniew.
Ïa katei ka jingkyrpad ki bahaïing, la pdiang da u majistor, Bah A.L Myrthong, bad hadien ïa ka met, la aiti noh sha ki bahaïing hasem ba kin pyndep ïa ka jinglehniam khatduh.
