Shillong, Jylliew 25
U MP ka seng Congress na Rae Bareilly, u Rahul Gandhi, ha ka Sngi Bar-Ar u la pdiang ïa ka rai jong ka Congress Working Committee (CWC) ba un shimti kum u Nongïalam ka Liang Pyrshah lane ‘Leader of Opposition’ ha Dorbar Lok Sabha.
Kane kan dei ka sien banyngkong hadien 10 snem ba ka Dorbar Lok Sabha kan ïoh ïa u Nongïalam ka Liang Pyrshah bapura. Ban ïoh ïa ka shuki Nongïalam ka Liang Pyrshah, kano-kano ka seng saiñpyrthei kaba shong ha ka liang pyrshah, ka donkam ban ïoh palat 54 ngut ki MP. Ha kine ki 10 snem ba la leit noh, ka Congress, wat lada ka la long ka seng kaba bun paid tam ha ka liang pyrshah, hynrei ka khlem ïoh palat 54 ngut ki MP, bad namarkata, ym shym la don satia u Nongïalam ka Liang Pyrshah.
Ka jingpynbna ba u Rahul un shimti ïa katei ka kam ka long hadien ba ka National Democratic Alliance (NDA) ba la ïalam da ka BJP bad ka Congress ki la pynbna ba kin pynïeng kyrtong ban ïakhun na ka bynta ka ilekshon Speaker lane Lamphang ka Dorbar Lok Sabha.
Ka NDA kan pynïakhun da u Lamphang u barim, u Om Birla, uba dei u MP ka BJP na Rajasthan katba ka Congress ka la jied da u K Suresh uba long u MP ka seng na Kerala. Kumba ka long mynta, u Birla un jop da kaba suk namar ka NDA ka don haduh 293 ngut ki MP.
Ïa ka rai ban jied ïa u Rahul ban shimti ïa katei ka shuki la pynbna hadien ba la wai ka jingïalang jong ki nongïalam ki seng saiñpyrthei kiba don ha ka INDIA Bloc.
“Ka Chairperson (Sonia Gandhi) jong ka Congress Parliamentary Party ka la thoh da ka shithi sha u Pro-Tem Speaker, u Bhartruhari Mahtab, ha kaba la pyntip sha u ïa ka rai ban thung ïa u Rahul Gandhi kum u Nongïalam ka Liang Pyrshah ha Lok Sabha,” la ong u General Secretary ka Congress, u KC Venugopal.
