Tura, Jylliew:
Ka Tura Garo Senior Citizens Forum (TGSCF) ha ka Lah Sngi U Blei ka la kyntu ïa u Myntri Rangbah ka Jylla, u Conrad K. Sangma ban weng noh ïa ka jingtyrwa ha ka ban pynkynriah ïa ki ‘Hoolock Gibbon’ na Sonja Wildlife Rescue Centre, East Garo Hills sha kawei pat ka jaka.
Katei ka jingkyrpad tuklar ïa u Myntri Rangbah ka la wan hadien ba la ïoh jingtip ba ka tnad Forest & Environment ka thmu ban pynkynriah noh ïa ki ‘Gibbon’ na katei ka jaka sha ka Meghalaya State Zoo ha Umtrew kumjuh sha ki ‘Zoo’ ha Guwahati bad Lucknow.
Ka seng, haba pyrshah ïa katei ka jingthmu, ka la kyrpad ïa ka jingtuklar u Myntri Rangbah ban khang ïa katei ka kam, da kaba kdew ba wat ki nongshong shnong ka Silsotchigre, ha kaba la pynïeng ïa katei ka jaka ki kwah ban pynïeng ïa ka ‘Hoolock Breeding Centre’ ha ryngkat ka jingkyrshan na ka Sorkar ha jaka ban pynkynriah noh ïa kitei ki mrad.
Ka seng ka la kdew ruh ba ki Garo ki ñiew kyrpang ïa ki ‘Gibbon’ bad ka jingpynkynriah noh ïa ki sha kawei pat ka jaka ka lah ban buh jingma ïa ki namar ka mariang bad ka jinglong-jingman ka suiñ bneng kan ym ïahap na bynta jong ki.
Ka seng ka la pynkynmaw ruh ïa ka jingjia ha kaba u ‘Hoolock Gibbon’ u la phet na katei ka jaka ha u snem 2023 hadien ba ka ‘ruh’ kaba la set ïa u ka la julor namar ka ‘erïong, da kaba bynrap ba ki lad jingshngaiñ bad jingïada kim pat biang ha katei ka ‘Rescue Centre’.
“Donkam ban pynbha ïa ka ‘Rescue Centre’ bad ngi kyntu ïa ka Sorkar ban kner jingkyrshan khnang ban kyntiew kydan ïa ka ban pynneh-pynsah ïa kine ki mrad ha katei ka jaka,” la ong ka seng.
Na ka liang ka TGSCF ka la kyrpad ruh ïa u Myntri Rangbah ban bthah ïa ka tnad ba dei peit ban khmih bniah bad weng ïa katei ka jingtyrwa ban pynkynriah ïa ki mrad da kaba buh jingmut ïa ka jingïada bad jingpynneh-pynsah ïa ki jingthung bad jingthaw ba don jingim jong ka jaka.
