Sha ka Meghalaya Lokayukta ujor ka HYC pyrshah ïa ka Director ka tnat Housing

Halor ka jingthung jingtohkit ba la pynbna da u Myntri ban khlieh da u Joint Secretary, u Bah Roykupar u la ong ba ka dei tang ka jingpyndep rukom.

Shillong, Jylliew 25

Ka Hynñiewtrep Youths’ Council (HYC) ha ka Sngi Ba-ar ka la buh da ka jingujor hakhmat jong ka Meghalaya Lokayukta pyrshah ïa ka Director ka tnat Housing halor ka jingkynnoh ba la pyndonkam bakla ïa ka pisa paidbah ban thied da ki tin sop ïing ‘aluminium’ kiba stang ïa kiba la sam sha ki Block bapher bapher ha rilum Khasi Jaiñtia.

Ka jingleit buh jingujor ka HYC ka long ruh ba ka Meghalaya Lokayukta kan tohkit halor kane ka kam jong ka jingsam da ki tin sop ïing kiba stang sha ki paidbah lyngba ki Block namar ki tin kiba dei ban don ka jingrben 0.45 hynrei la lap ba ki tin ki long tang 0.25 ka jingrben.

Ka HYC ka la kyntu ruh ïa ka Lokayukta ba kan bthah ban sangeh noh shwa ïa ka jingwanrah bad sam ïa kitei ki tin sop ïing da ka kompeni Hariana Iron Works Private Limited sha ki C&RD Block bapher bapher hapoh ka jylla.

Shuh shuh ha kane ka jingujor la pynpaw ruh ka jingdonkam ban bthah ïa ka jingtohkit kaba laitluid bad kaba bniah ha kane ka bynta baroh kawei jong ka jingthied ïa ki tin sop ïing kiba stang bad ki bym bha satia, bad ban ithuh bad pynshitom ïa kito kiba donkti ha kane ka kam bad ruh ban pynshitom ïa ka Director ka tnat Housing lane kiwei pat ki ophisar kiba donkti ha kaba thied ïa ki tin sop ïing kiba stang bad ruh ban thung da u Nodal Officer ban leit jurip bad ban pynshisha ryngkat ka jingujor ha kaba ïadei bad ka jinglong jong kine ki tin sop ïing sha ki C&RD block bapher bapher ha rilum Khasi Jaintia.

Kane ka jingujor da ka HYC ka la wan ruh shisngi hadien ba u Myntri ka tnat Housing u Marcuise N Marak u la pynbna ba la thung ïa ka jingtohkit ‘Departmental Inquiry’ halor ka jingkynnoh ba sam tin sop ïing ba stang.

Haba ïakren bad ki lad pathai khubor hadien ba la dep ban ujor, u President ka HYC Bah Roykupar Synrem u la ïathuh ba ïa kane ka jingujor la leh katkum ka kyndon 20 jong ka Meghalaya Lokayukta Act, 2014.

U la pyntip ba ka jingujor ka long pyrshah ïa ka Directorate ka tnat Housing halor ka jingkynnoh bamsap na ka jingthied ïa ki tin ha ka jinglut kaba ym duna ïa ka 20 klur tyngka.

Halor ka jingthung jingtohkit ba la pynbna da u Myntri ban khlieh da u Joint Secretary, u Bah Roykupar u la ong ba ka dei tang ka jingpyndep rukom. “Namar ba ka seng kam hun ïa ka jubab u Myntri, nga kum u nongujor nga la wan ujor pyrshah ïa ka Directorate ka tnat Housing ha ka Meghalaya Lokayukta namar baroh ki tip ba ka Lokayukta ka don ïa ka bor ban tohkit ïa ki jingkynnoh bamsap pyrshah ïa ki nongtrei ne ki ophisar Sorkar,” u la ong.

Nalor kane, ka HYC ka la dawa ïa ka Sorkar ba kan phah pynphai biang ïa ki tin ba la dep pynpoi sha Jirang, Shella bad Nongstoiñ C&RD Block namar ki dei kiba stang palat bad kim long ban sop ïa ki ïing.

“Ha ka jingujor, ngi la dawa ba dei ban pynshitom ïa kiba don bynta ban pynsyrwa kai ïa ka pisa u paidbah namar katkum ka Tender jong ka jingthied ïa ki tin sop ïing, ka poi ym duna ïa ka T.20 klur bad ki tin ki dei ban don ka jingrben 0.45 hynrei ka seng ka la ïoh ka jingujor ba ki tin ki long tang 0.25 ka jingrben” la bynrap shuh shuh u Bah Roykupar.