Ba shah kynnoh khleh um ïa ka umphniang kali, wan pynshai ka kynhun ki trai Petrol Pump

Ka kynhun ki nongkhaïi umphniang Petrol kiba don hapoh ka jylla ïa kaba la tip kyrteng kum ka Petroleum Dealers Association Meghalaya (PDAM) ka la ong ba ka jingkynnoh kaba la mih ba ïa ka...

Shillong, Jylliew 26

Ka kynhun ki nongkhaïi umphniang Petrol kiba don hapoh ka jylla ïa kaba la tip kyrteng kum ka Petroleum Dealers Association Meghalaya (PDAM) ka la ong ba ka jingkynnoh kaba la mih ba ïa ka umphniang Petrol bad Diesel la khleh lang bad ka um ka long kaba bakla jur hynrei kane baroh ka dei ka jingkhleh Ethanol kaba long haduh 20% ha ka umphniang Petrol kumba la bthah da ka sorkar pdeng.

Haba kren sha ki lad pathai khubor ha ka Sngi Balang, u President ka Petroleum Dealers Association Meghalaya (PDAM), u Bah Kennedy Khyriem u la ong ba ka sorkar India naduh u bnai Rymphang 2022 ka la wanrah ïa ka jingbthah ban khleh 10% ka Ethanol ha ka umphniang Petrol namar kane ka jingkhleh ïa ka Ethanol ha ka Petrol ne Diesel ka ai jingmyntoi ha kaba ka tdem kaba mih na ki kali ka duna bad kaba wanrah jingkhuid ïa ka lyer hynrei ha kawei ka liang ka wanrah jingduh jingmyntoi ruh namar lada ka Ethanol ka ïadei bad ka um, kaba bun ka Petrol ka kylla um.

“Kine ki la mih bun bha ki jingjia na ka por sha ka por ba ki paidbah nongpyndonkam ïa ka umphniang ki la ong ba ki theh umphniang na kata ka Petrol Pump kaba don da ka um”, la ong u Bah Kennedy.

Kitei ki nongïalam ki la ong ba ha kum ka jylla Meghalaya ba jur slap ha ka por lyiur bad nalor ba ka la long lypa ka jylla kaba khapngiah, kiba bun ki kali ki la pynïeng ha ki jaka ki bym don jingker-jingda khamtam ki ar shaka ne ki thuk-thuk, bad kane ka la pynlong ïa ka um ba kan rung hapoh ka ‘tank’ jong kitei ki kali bad ki thuk-thuk kaba la pynlong pat ïa ki Petrol Pump ba kin shah kynnoh ba ki khleh um ïa ka petrol bad don na ki hi kiba lah shah pynbor ban siew ïa ka bailutksan.

U la ïathuh ba na ka liang ka Sorkar India haduh mynta ka la pynkiew ïa ka jingkhleh Ethanol da 20% bad namar ka Ethanol ka long ha ka dur Hydroscopic bad kumta ka tan ka um bad kane ka buh jingma ïa ki kali.

 U la ai jingmut sha ki paidbah ba ki dei ban peit bad sumar bha ïa ki kali bad ki thuk-thuk jong ki namar ka jingshah kynnoh ba ka don ka jingkhleh um da ki Petrol Pump ha ka umphniang Petrol bad Diesel ka dei kaba bakla hynrei baroh ka daw ka dei na ka jingbym peit bha bad sumar bha jong ki trai ïa ki kali kaba pynlong ban rung um shapoh ki tank jong ki kali bad thuk-thuk.

U Bah Kennedy u la ong ba ka don ruh ka jingjia ba ki tank ban thep umphniang kiba dei 30 liter hynrei lada thep umphniang kali rung haduh 32 bad hangne ruh ka don ka jingshah kynnoh ba kam biang, kumta u la ong ba ka jingthew ka biang hynrei ka dei ka tank jong ki kaba lah ban long kaba kham heh khyndiat.

U la kyntu ïa ki paidbah kiba wan thep umphniang na ki Petrol Pump ba ki dei ban peit bniah ïa ka mashin thep umphniang khnang ba kin ïohi dalade ba lada u jingthew u don ha u ‘0’, ki lah ban phah thep ïa ka umphniang hynrei lada u jingthew um don ha u ‘0’ dei, ki lah ban phah sangeh ban thep ïa ka umphiang.

“Na ka liang jong ngi ki trai umphniang ngi kyrpad ha ba ki paidbah ki wan thep umphniang kin sngewbha ban ïeng pyrshah bad ka katei jaka thep umphniang khnang ban ïohi ba lada ka don ha u ‘0’ sa thep bad lada kam don ha u ‘0’, ki dei ban phah sangeh ban thep bad phi lah ruh ban ujor halor kane”, la ong u Bah Kennedy.

U Bah Kennedy u la ong ba kum ki Petrol Pump ki donkam ban don ka jingïatreilang bad ki nongwan phah thep umphniang khnang ba kan don ka jingïoh jingmyntoi lem na baroh arliang da kaba kyntu ruh ïa ki trai ba kin sumar ïa ïa ki thuk-thuk bad ki kali khamtam ha kum kane ka por slap.