Buh da ka ‘ward’ la ka jong ïa kiba kyrni drok ha ki jaka sumar ka Sorkar ha baroh ki district

Ïa kane la pynpaw da ki nongkitkam ka MSSCF kiba la wan ban ïakynduh ïa u Bah Paul bad aiti ruh ha u ïa ka jingthoh kaba don katto-katne ki jingai jingmut.

Shillong, Jylliew 26

Ka kynhun ki nongshong shnong kiba la san hapoh ka shatri jong ka Meghalaya State Senior Citizens Forum (MSSCF) ka la phah shibun ki jingai jingmut sha u Myntri ka tnat Social Welfare, u Bah Paul Lyngdoh ban ïakhun ïa u drok bad kumno ban pynbha pat ïa kiba la kyrni ha une u jingdih basniew.

Ïa kane la pynpaw da ki nongkitkam ka MSSCF kiba la wan ban ïakynduh ïa u Bah Paul bad aiti ruh ha u ïa ka jingthoh kaba don katto-katne ki jingai jingmut. La mihkhmat ïa kane ka Kynhun da u Bah Alex Gatphoh kum u Acting President bad Bah Khrawboklang Basaiawmoit kum u General Secretary ha ryngkat kiwei pat ki nongkitkam.

Napdeng kiba bun ki jingai jingmut, ka MSSCF ka la ong ïa ka Sorkar ban buh da ka ward (kamra) la kajong na ka bynta kiba kyrni ha u drok ha baroh ki jaka sumar jong ka Sorkar kiba don ha ki district bapher bapher bad ban ai jingsumar ei na ka bynta kito kiba dei na ka longïing ba duna ka ïoh ka kot.

Ka MSSCF ka la ai jingmut ban kham pynbun ïa ki jaka sumar ban pynbha pat (rehabilitation centre) na ka bynta kito kiba ngop ha u drok bad ban pyndonkam ruh ïa ki ïing Sorkar kiba khlem pyndonkam bad shu ieh kumto ban pynlong kum ka jaka pynsah ïa kiba dei ban shah sumar bad pynbha biang ïa ka jingim.

Shuh shuh ka MSSCF ka la kyntu ïa ka Sorkar ban kyrshan ruh ïa kine ki jaka ba pynsah ïa kiba kyrni ha u drok haba ki shah sumar bad kiba bun ki jaka pynsah ban sumar ki dei kiba pynïaid da ki kynhun shimet kaba buh jingeh ïa kiba duna ka ïoh ka kot ban phah sumar na ka bynta ban pynbha pat ïa kiba la kyrni.

Kane ka kynhun ka ong ruh ba u drok u la jyllei shaba palat ha nongbah Shillong bad ha kiwei ki bynta jong ka Jylla bad ïa kane ka jingma donkam ban ïakhun lang da ka imlang sahlang baroh bad kaba kham donkam eh ka long ban pynbha pat ïa kiba la ngop.

La ai jingmut ruh ban buh da ki briew kiba la shemphang kiba lah ban sngewthuh ïa ki jingeh ba mad da kito kiba kyrni ha u drok khnang ban ai ka sneng ka kraw bad jingpynsngewthuh ïa kito kiba la kyrni haba don ha ki jaka ba pynsah ban shah sumar khnang ban pynbha pat ïa ka jingim jong ki.