Shillong, Jylliew 26
U kyrtong ka National Democratic Alliance bad u MP ka BJP na Rajasthan, u Om Birla, u la jop da kaba suk ha ka ilekshon jied Speaker lane Lamphang ka Ïingdorbar thawaiñ Lok Sabha ha ka step Sngi Balang.
Da ka jingrah sur, u Birla u la pynliem ïa u kyrtong ka liang pyrshah bad u MP ka Congress, u K Suresh.
Ïa ka ilekshon jied Speaker la pynïaid da u Lamphang ba shipor, u B Mahtab. Na ka liang ka liang synshar, u nongïalam ka ïingdorbar thawaiñ uba long ruh u Myntri Rangbahduh ka Ri u Narendra Modi u la wanrah ïa ka mat ban pynpaw ba u Birla u dei ban shah jied kum u Lamphang ka Ïingdorbar Thawaiñ Lok Sabha. Ïa kane ka mat la kyrshan lang da u Rajnath Singh uba long u Myntri ka tnat ïada ri. Nalor kine, ki la don ruh sa kiwei ki MP kiba la wanrah ïa kajuh ka mat ban jied ïa u Birla.
Na ka liang ki MP kiba shong ha ka liang pyrshah ruh ki la wanrah ïa ka mat ban pynsngew ba dei ban jied ïa u K Suresh kum u Lamphang.
Na ka liang u Mahtab u la buh ïa ka mat ba la wanrah da u Modi hakhmat ka Dorbar ba kan rai bad lyngba ka jingrah sur, kiba bun na ki MP ki la ai jingkyrshan ïa kane ka mat. Hynrei na ka liang ki MP ka liang pyrshah ki la pynpaw ïa ka jingbym kyrshan ïa kane ka mat.
Tangba hadien ba u la sngap thuh ïa ka jingrah sur, u Mahtab u la pynbna ba ka mat ba la wanrah da u Modi ka la ïoh jingmynjur na kiba bun ngut ki MP bad namarkata, u Birla u la shah jied kum u Lamphang ka Ïingdorbar thawaiñ Lok Sabha.
Hadien ba la pynbna ba u la jop ïa ka ilekshon, la synran ïa u Birla sha ka shuki Lamphang da u nongïalam ka Lok Sabha, u Narendra Modi, u nongïalam ka liang pyrshah, u Rahul Gandhi bad u Myntri Sorkar Pdeng, u Kiren Rijuju.
Kane kan dei ka sien kaba ar ba u Birla un shah jied kum u Lamphang ka Lok Sabha. Une u MP na Kota, Rajasthan u la long u Lamphang ka Lok Sabha naduh u snem 2019 haduh ba kut ka samoi ba san snem.
