Shillong, Jylliew 26
Kawei ka taksi kamai ka la julor hadien ka jingwan hap kynsan jong u mawbah hapdeng surok hajan ka shnong Pomlum kaba dei ruh ka surok Shillong-Pynursla sha Dawki.
La ong ba kane ka kali kamai ka dei kaba la mih na Laitlyngkot da ka jingthmu ban hiar sha Pynursla kaba dei ka sngi ïew. Hynrei mar ïa poi ha katei ka bynta jong ka surok kaba khim, kyndit-kynsan la wan hap u mawbah bad ïoh syllad ïa ka kali na ka bynta ba shakhmat haduh ba ka la julor bun bha.
Ha kane ka jingjia, u nongñiah jong kane ka kali kaba don ïa u number ML05-M-0374 u la mynsaw, katba kiwei pat kiba la don lang ha kane ka kali ki la lait bad khlem mynsaw satia. Ïa u nongñiah jong kane ka kali ba la mynsaw la pynkit noh sha ka jaka ai jingsumar.
La ong ba hadien kane ka jingjia, ki nongleit nongwan na katei ka bynta ki la ïaid ha ryngkat ka syier bad rit mynsiem.
