Tura, Jylliew 26
Ki pulit ka West Garo Hills ha ka Sngi Balang ki la ïoh kem ïa hynriew ngut kiba la donkti ban shoh ban dat ïa kawei ka kynthei ha ka shnong Lower Teksragre kaba hap ha thanat Damal Asim ha Dadenggre.
Ka jingshoh la kum ki ‘riewkhlaw ïa katei ka briew ka la jia ha phyllaw jong kawei ka skul kaba don ha katei ka shnong. Ki pulit ki la ong ba kitei kiba la shah kem ki dang dei ki bahaïing bahasem kiba dang ïajan bad katei ka kynthei.
Haba ïakren bad u Superintendent of Police (SP) ka West Garo Hills, u Abraham T Sangma, MPS, mynta ka miet, u la ong, “Haduh mynta, ngi la ïoh kem ïa hynriew ngut ki briew kiba la donkti ban shoh ban dat ïa ka, bad kine ki hynriew ngut ki dei ki bahaïing bahasem jong ka kum u kñi, hynmen/para arkmie, khun kha/khun ruit.”
U la ong ba katei ka jingjia ka la wan hadien ba u Nokma jong katei ka shnong u la khot hajir ïa katei ka kynthei kaba la don kumba 37 snem eiei ha ka rta.
Shuh shuh u SP u la ong ba ka jingkem ïa ki katto-katne ngut na kitei ki hynriew ngut ka long katkum ka jingïathuh jong katei ka kynthei kaba la shah shoh bad ïa kiwei pat la kem katkum ka jingpaw jong ki dur jong ki ha ka dur khih.
Ka tyllong khubor ka ïathuh ba ka jingkhot hajir ïa katei ka kynthei ka long hadien ba kawei ka longkmie ka la ai da ka jingujor da kaba kynnoh ba katei ka kynthei ka la don jingïadei bad u kurim jong ka.
Lah ban kdew ba kawei ka dur khih lane ka video ka la saphriang ha kaba la ïohi ïa saw ngut ki shynrang kiba la shoh la dat da kaba sympat da ki siej ïa kawei ka kynthei. Katkum ka jingtip ba la ïohlum la ong ba katei ka jingshoh jingdat ïa katei ka kynthei ka la jia ha ka Sngi Ba Ar ka 25 tarik Jylliew.
Ha katei ka dur khih la ïohi ruh ba wat hapdeng ka jingshoh jingdat jong kitei ki saw ngut ïa kawei ka kynthei hynrei ki paidbah kiba la ïalum ki la shu ïa peit kai. Hynrei hadien katto-kane por u la don uwei u ‘riew rangbah uba la don ha katei ka jaka uba la mih shakhmat ban kyntu ïa kitei ki saw ngut ba kim dei shuh ban shoh ïa katei ka kynthei.
Ki pulit ka West Garo Hills ki la ïohi ïa katei ka dur khih mynta ka step bad mar-mar ki la sdang ïa ka kam ban wad ïa kitei kiba donkti. Ka la don kawei ka dak kaba paw ha katei ka dur khih kaba la ïarap ïa ki pulit ban ithuh ba katei ka jaka ka dkn hapoh ka Dadenggre Sub-Division.
U SP u la ïathuh ba ka kynhun pulit ki la leit Damal Asim bad na ka liang ki katto katne ki trai shnong ki la ïarap ban kdew haei katei ka shnong ka don.
U la ong ba hadien ba la lap ïa ka shnong, ki pulit ki la ïohlad ban ïakren bad katei ka kynthei kaba la shah shoh bad ka la ïathuh ha ki ïa kaei kaba la jia.
Nalorkata u la ong ba ha kaba nyngkong, ki pulit ki la ïoh ban kem shwa ïa arngut kiba la donkti ban shoh ïa katei ka kynthei. Arngut pat ki la phet krad hadien ba ki la ïoh jingtip halor ka jingsaphriang jong katei ka dur khih.
Hynrei mynta ka janmiet, ki la ïoh ban kem sa ïa saw ngut kiwei pat kiba la donkti ha katei ka jingjia.
Na ka liang ki pulit ki la ïalam ïa katei ka kynthei sha hospital ban phah peit bniah ha ki doktor bad kumba ka long mynta, kam da don kano kano ka jingma ïa ka koit ka khiah jong ka.
Ki pulit ki la pynrung da ka jingujor ha thanat Tura bad ka jingtohkit ka la sdang. U SP u la ong ba ïa kitei kiba la shah kem yn sa rah sha ïingbishar ha ka Sngi Palei.
