Jowai, Jylliew 26
Kawei ka longkmie kaba dei ka nongdie dohkha ha ka 26 tarik Jylliew ka la ujor da ka ejahar ha thanat Jowai halor ka jingshah kren khor kren tohmet bad shah jrong kti ha uwei u nongdie dohkha bar jylla ba shong die dohkha hajan Merusa Building.
Ha kane ka juh ka sngi, une u nongdie dohkha (bar jylla) uba tip kyrteng kum u Sunil Das u la ujor ba u la shah shoh shah dat katba u dang don ha dukan lajong ha ki dkhot jong ka Khasi Students’ Union (KSU) Jowai Circle bad shah pynpait pynpra ki ïit dukan jong u.
Ki nongïalam jong ka KSU Jowai Circle ki la ïoh ïa ka jingujor na kane hi ka longkmie ka Kong S Suchiang halor kane ka jingjia.
Katkum ka ejahar la ong, ba ka Kong S Suchiang ha ka janmiet jong ka 25 tarik Jylliew ka la leit kylli ïa ka dor jong ka dohkha Phankas na ka bynta ban thied na u Sunil namar ba ka thmu ban die pateng ha dukan jong ka. Hynrei u Sunil u la jubab ba ym ju die dohkha da ki bun kilo namar u thied dohkha na ki nongshalan dohkha tang kat ban die ïalade.
Ka Kong Suchiang ka la kynnoh ba hangta hi une u bar jylla u la khynñiat ïa ka bunsien bad kren khor kren tohmet ïa ka bad ka la kynnoh ruh ba utei u bar jylla u la khynñiat ïa ka na tyrpeng bad haba ka pyrshang ban kren ïa u bad u la sdang pat ban jrongkti ïa ka.
Ha kawei pat ka liang, u Sunil Das u la ïathuh ba kawei ka longkmie ka la wan ha dukan jong u ban pan thied dohkha shibun hynrei u la kyntait ban die dohkha shibun namar u thied tang ban die ïalade. U la ong ha ka step 26 tarik Jylliew ki dkhot jong ka KSU ki la wan sha dukan jong u bad ktah kti ïa u.
Halor kane ka jingjia, baroh arliang mamla ki la dep ujor ejahar ha thanat Jowai bad ka jingtohkit ka la ïaid shakhmat.
