Shillong, Jylliew:
Ka Hill State People’s Democratic Party (HSPDP) ha ka Sngi Ba-ar ka la kren shai ba wat la ka ïadonlang bad ka United Democratic Party (UDP) ha ka Regional Democratic Alliance (RDA) hynrei kan ïakhun hi marwei ha ka ilekshon MDC ban wan.
“Ha kane ka ilekshon ba la dep, ngi ïadonlang hapoh ka RDA, naduh mynshuwa, ngi ïarem, ngi ïa jop, ngi ïatrei bad ngi pynneh ïa kata ka jingïatreilang. Haba ïadei pat bad ka ilekshon MDC, ngi pynkhreh hi la ka jong kum ka seng bad la ka jong ka shap,” la ong u President ka HSPDP, Bah K.P. Pangniang haba kren sha ki lad pathai khubor. U la ong ruh ba kum seng ka ïeng skhem ha ki nongrim naduh ba la buh ha ki mat jingkular (haduh mynta), bad kan ïaid shakhmat bad ka jingthmu jong ka halor ki nongrim kiba skhem.
“Ngim don eiei ban ong halor kiwei-kiwei ki seng. Kaba ngi don ban ong ka long ba ka HSPDP ha ka jingïaid lynti kaba 55 snem jong ka, naduh ka por u Bah Hopingstone Lyngdoh kum u nongïalam bad ki nongrim jong ka, ngin ïai shakri, ngin ïai trei…kata ka dei ka kamram jong ngi,” u la ong.
Haba kren halor ka jingpynkhlaiñ ïa ka seng, u la ong ba ka seng kan sa kner sha baroh ki shnat treikam jong ka ha ki distrik bapher-bapher khnang ba kin nang pynkhreh ban pynkhlaiñ ïa ka seng kumjuh ban pynithuh noh ïa ki kyrtong na bynta ka ilekshon MDC wat la ym pat pynbna ïa ka tarik ilekshon. Haba kylli, u la ong, “Ngin sa shong jingïalang halor ki kyrtong hadien ka jingpynithuh na ka liang ki distrik.”
Haba phai pat sha ka ilekshon MP kaba dang shu dep, u President u la ong, “Ngim don eiei ban ong, ka dei ka rai, ka dei ka jingshemphang jong ki paidbah kane ka Jylla jong ngi, khamtam jong ka Shillong Parliamentary konstitwensi.”
U la ong ruh ba kum ka seng, ka pdiang ïa ka rai u paidbah ha kane ka ilekshon bad ka ai khublei ha kajuh ka por ïa u paidbah uba don ka jingïohi kaba kham kyrpang ha kane ka ilekshon. Haba jubab, u la ong, “Kata ka dei ka rai jong u paidbah, ngi burom ïa ka rai u paidbah bad ngim don daw eiei pyrshah ïa ki paidbah. Hynrei kaei ka rai kaba u paidbah u la ai, ngi pdiang sngewbha ïa kata bad nga ngeit ba kiba jop ruh kin ai ka jingshakri kaba kham bha hadien ba ki la shah jied.”
Na ka liang u Bah Pangniang u la ban biang ba ka seng kan ïai ïeng skhem, pynkhlaiñ bad pynbit pynbiang ïalade nangne shakhmat. Shuh shuh ka seng ka la ai khublei ïa ki 2 ngut ki MP ka Jylla – Dr. Ricky A.J. Syngkon (VPP) bad u Saleng Sangma (Congress) kiba la ïoh ïa ka jingjop ha kane ka ilekshon bad kitbok kitrwiang ïa ki ba kin nang ïoh ka met kaba koit ba khiah, bad ba u Blei un don ryngkat bad ki khnang ba kin lah ban trei bha na bynta ka Jylla.
