Shillong, Jylliew:
Ka Child Friendly Shillong (CFS), ka projek hapoh ka BIDS (Bosco Integrated Development Society) ka la ïoh ban plie ïa ka jingïalap ha ka 24 tarik mynta u bnai halor ka phang, “Mano ban Ïada ïa nga? Ma nga bad Ma phi…” bad ka ‘Sub-theme’ ka long, “Ban pynskhem ïa ka jingshong shngaiñ ki khynnah”.
Ïa kane ka jingïalap la pynlong ryngkat ka jingïatreilang ki dkhot jong ka Civil Society Forum Members (CSFM) bad kiwei pat ki tnad treikam ka Sorkar.
Ka Kong Matti Warjri kaba dei ka ophisar ka District Child Protection Unit, bad ka Kong Sandra Nongdhar, Dy. SP for Women & Children, EKHD Shillong ki la long ki kongsan ha kane ka sngi. Ki khynnah skul bad ki Principal bapher-bapher ki la ïadonlang ha kane ka prokram ryngkat katto-katne ki Rangbah Shnong. Ïa ka jingïalap yn sdang naduh 25 tarik mynta u bnai bad kan bteng haduh 11 tarik u Nohprah, 2024.
