Nongstoiñ, Jylliew:
Halor ki san tylli ki mat jingdawa, ka Hynñiewtrep Youths’ Council (HYC) Nongstoiñ Circle ha ka Sngi Ba-ar ka la leit ban ïakynduh ïa u District Transport Officer (DTO), West Khasi Hills bad aiti ruh ïa ka jingthoh.
Katkum katei ka dorkhas ïa kaba la aiti sha u DTO, ka HYC ka la pynpaw ïa ka jingdawa ban pan jingpynshai halor ki mat kiba kynthup ban pyntikna ba baroh ki taksi kamai ki dei ban pyndait ïa u ‘Taxi Light’, ka tnat kam dei ban ailad tang ïa ka traffic branch ban peit ïa ki kot kali khlem da don lang ki MVI lane ki Sub-Inspector (Police), katno ka dor (Rate) haba aplai License thymmai (Fresh), balei hap ban don ki mynnong (agent) ban aplai License, donkam ne em ïa ka Medical Certificate haba aplai License, bad kumno kiba duna dkhotmet ki lah ban ïoh ïa ka License haba ki aplai.
U samla Redfernandy Sun, General Secretary ka HYC Nongstoiñ Circle haba kren sha ki lad pathai khubor hadien ka jingleit ïakynduh ïa u DTO, u la ong, ka jingdawa jong ka HYC halor kitei ki mat ka long ban bthah bad hukum ïa baroh ki taksi kamai ba ki dei ban pyndonkam ïa u ‘Taxi Light’ namar ka jingbym don ‘Taxi Light’ ha ki kali ka kamai ka la pynkulmar bha ïa ki nongap kali khamtam ha ka por miet.
U la ong ruh ba halor ka mat ba ka DTO kam dei ban ailad than tang ïa ki pulit pynïaid kali (traffic branch) hynrei dei ban don ki MVI kumjuh bad ki pulit kiba bat ïa ka kyrdan Sub-Inspector shaneng, ba ka jingtalasi kan long kaba shai bha ka kam haba talasi ïa ki kot kali ha surok.
Halor ban aplai ïa ka License thymmai kaba donkam ruh ïa ka Medical Certificate bad kiwei ki kot, u samla Redfernandy u la pynpaw ba ka HYC ka lyngngoh ba ki don pat kiba don ka jingduna ki ïoh thik thik ban leh ïa ki license. Halor kane ka bynta u DTO u la pynpaw ka jingkyndit namar kine baroh ki jia ha ki por bad ki snem ba la leit lehse lah ban ong ba ha ka por ba don da kiwei pat ki ophisar bad u la kren shai ba kan ym jia shuh.
Shuh shuh ha kaba ïadei bad ka dor ban aplai ïa ka License thymmai, u samla Redfernandy u la ïathuh ba na ka liang u DTO u la ïathuh ba ka long tang 350 ka bai test ïa ki nong aplai bad 1000 ka bai pass katba ka jinglap jong ka seng kawei ka License ka poi haduh 3000 lane 4000. Kumta na ka liang ka seng hadien ba ka la peit pyrman bad ïoh ruh ka jingujor ba ka jingdon kita ki mynnong (agent) ka sa pynlong ban kiew ka dor. Na ka seng ka la dep kren hakhmat u DTO ba um dei ban shah ïa ki mynnong hynrei na ka liang jong u, u la ong ka jingdon kine ki mynnong ka dei ba kita ki heh spah lane ki businessman kim lait por ban wan hi ha ophis bad kumta ki phah ïa ki ban pynleh hynrei halor kane ka bynta pat na ka liang ka seng ka dap da ka jingsngewkhia namar ba hato kita ki heh spah ki lah ban siew ïa kata ka 3000 lane 4000 hynrei u duk u suk pat naei un leit tuh ïa katei ka pisa.Namar kata, ka seng ka kyntu ïa ki paidbah ban kiar na kaba leh suk naba ka seng kam kwah ruh ban tuklar ïa kam jong kita mynnong hynrei ki dei ban antad ïa ka dor ka mur, ki dei ban da peit katkum ka jingïoh jong u ne ka briew ym ban shu shim kabu palat. Lada ka seng ka lap ba ka don ka jingshim kabu kan sa pyrkhat pat ban shim da kiwei ki lad ki lynti.
