Shillong, Jylliew 27
Ha ka Sngi Palei u Myntri Rangbah ka Jylla u Conrad K Sangma u la pyllait paidbah ïa ka Chief Minister’s Research Grant (CMRG) kum shi bynta ban pynshlur bad kyntiew ïa ki kam wadbniah (Research) hapoh ka Jylla.
Ha ka jingïalang pyllait ïa ka CMRG ba la pynlong ha Secretariat, la ïadon lang u Myntri ka tnat Arts & Culture u Bah Paul Lyngdoh, ki ophisar sorkar lem bad kiwei kiwei.
Ka jingthmu ba hakhmat eh jong ka CMRG ka long ban pynshlur ïa ki kam wadbniah ha ki bynta bapher bapher ba kynthup ïa ka Arts & Culture, ki Jaidbynriew riewlum trai Jylla, ka Ktien ka Thylliej, ka jinghiar pateng, ki jingtei sahnam u mynbarim bad kiwei kiwei.
Na ka bynta kine ki projek, la mang ruh ka song pisa ka ban long 3 lak tyngka na ka bynta kawei pa kawei ka projek bad na ka liang ki nongwad bniah kin hap ban pyndep ïa kane ka projek hapoh ka 10 bnai.
Ïa ki aplikeshon ban ïoh ïa ka grant yn pynkut ha ka shiteng miet jong ka 20 tarik Naitung, 2024. Ki scholar kiba shah jied kin sa ïohktien hapoh ka taiew ba-ar jong u Nailar, 2024, bad ïa ka instalment ba nyngkong jong ka grant yn pyllait ha ka 15 tarik Nailar 2024. Ki scholar kiba kwah ban aplai ki lah ban phah ïa ki kyrteng online lyngba ka website ka Sorkar, ka tnat Arts & Culture bad ka tnat Social Media Handles.
Ka rukom jied ka kynthup ïa ka jingbishar bniah da ka CMRG Committee, bud da ka personal interview ka ban long ha Shillong. Ki kyrtong ba shah jied ki dei ban pyni bad batai ïa ki rukom leh ïa ka jingwad bniah bad ïa ka thup jong ki kyrtong ba shah jied yn sa pynmih online.
Haba kren haba pyllait ïa ka CMRG, u Myntri Rangbah u Conrad K Sangma u la ban jur ïa ka jingkongsan ki jingwad bniah bad jingbuh jingthoh bad ong “Ngi don ka jingsngew ba ngi duna bha ka jingbuh jingthoh bad ka jingwad bniah. Ka jingwad bniah ba da leh thikna bad ka jingbuh jingthoh ki dei ki mawbyrsiew ïa kiba bun ki kam pynroi. Kane ka sienjam ka thmu ban kyrshan ïa ki khraw pyrkhat bad ki nongwad bniah kiba angnud ban synñiang hynrei ki bym don ïa ki nongkyrshan”.
“Ngi ïohi ba kane ka jingwad bniah kan dei ka jingai pateng ïa ka jingnang jingtip ka ban ai jingmyntoi ïa ki pateng ki ban wan. Ka jingthmu jong ngi ka long ban nang pynheh ïa kane ka prokram katba nang ïaid ka por. Ngi kwah ban sdang da kaba rit, shemphang na ki bad sa nang pynheh,” u la ong.
U la kyntu ïa ki Scholar ba kin aplai ïa kane ka grant bad ong “Kane ka prokram ka dei kaba mang ïa phi. Lada phim aplai, kan shu sepei kai noh. Ngi long kiba kloi ban nang pynheh ïa ka song pisa lada donkam. Nga ai khublei ïa baroh kiba don bynta ha kaban pynlong ïa ka jingpyllait ïa kane ka prokram kaba jop bad nga phaikhmat ban ïohi ïa ki jingmyntoi ki ban wan hapoh ka Jylla jong ngi”.
