Mawkyrwat, Jylliew 27
Ka Khasi Students’ Union (KSU) Mawkyrwat Circle ryngkat ka jingsynrang ka KSU South West Khasi Hills District ha ka 26 tarik u Jylliew 2024 ki la leit ban ïakynduh ïa u Myntri ka tnat bording u AT Mondal namar ka jingthut kaba man ka por jong ka bording ilektrik, ka jingsniew ba khah-khah jong ki transformer bad ka jingduna ki nongtrei hapoh ka Mawkyrwat Sub-Division.
Haba kren sha ki lad pathai khubor u President ka KSU South West Khasi Hills District u samla Forwardman Nongrem, u la ïathuh ba ki don haduh kumba 25 tylli ki transformer kiba la duh hapoh ka Mawkyrwat Sub-Division kaba la ktah haduh katta katta ïa kiba bun tylli ki shnong.
Ka seng ha kane ka jingïakren ka la ïoh ruh ban ai ïa ka kot jingthoh, ka la ïoh ban pynsngew halor ka jingduna palat ki nongtrei hapoh ka MePDCL Mawkyrwat kum ha Wahkaji, Phlangdiloin, Umdohlun, Rangthong, Nongnah bad Warsan Lyngdoh ha kaba uwei u nongtrei u hap ban peit haduh kumba laiphew tylli ki shnong kaba la wanrah ïa ka jingdkoh ha rukom treikam.
Ka seng ka la ïoh ban pynsngew halor ka jingsarang ki post ilektrik ha man la ki jaka kaba buh jingma ïa ki paidbah.
Kumta ka seng lyngba u samla Forwardman bad samla Melvernstone Marngar, Finance Secretary KSU Mawkyrwat Circle ki la dawa ïa u Myntri ban bujli noh ïa kine ki post ilektrik, ban pynbun nongtrei (line man) shuh shuh hapoh ka MePDCL Mawkyrwat bad ban bujli noh mardor ïa ki transformer da kiba thymmai.
Ka seng ka la ïathuh ruh ba ha kane ka jingïakren na ka liang u Myntri u la kular ba un sa shimkhia ïa kane ka kam.
