Shillong, Jylliew 27
Khnang ba ka jaka pule doktor bad ka jaka ai jingsumar jong ka North Eastern Indira Gandhi Regional Institute of Health and Medical Sciences (NEIGRIHMS), kan ïoh noh ïa ka kyrdan Institute of National Importance (INI) bad ban ai bhah ruh ïa ka Jylla ban pule doktor Post Graduate, ka Myntri ka tnat ka koit ka khiah ka Jylla ka Kong Ampareen Lyngdoh kan leit buddien bad ïakynduh ïa u Myntri ka tnat ka koit ka khiah ka Sorkar Pdeng.
U Myntri ka koit ka khiah ka Sorkar Pdeng, u JP Nadda u dang shu shimti thymmai hadien ba la thaw ïa ka Sorkar NDA 3.0 kaba lamkhmat da ka BJP kaba la wan biang ha ka bor hadien ka ilekshon Lok Sabha kaba dang shu dep.
Haba kren sha ki lad pathai khubor ha ka Sngi Palei, ka Kong Ampareen ka la ong ba ha ka taïew ban sa wan kan sa leit ïakynduh ïa u Myntri ka koit ka khiah ka Sorkar Pdeng na ka bynta ban buddien ïa katto-katne ki mat kiba sahteng kynthup ka jingkyntiew ïa ka NEIGRIHMS sha ka kyrdan ‘INI.’
Ka Institute of National Importance (INI) ka dei ka kyrdan kaba pynkup ha kano-kano ka jaka pule bad kaba don ruh ka bynta kaba khraw ban pynmih ïa ki briew kiba tbit ha ki bynta bapher-bapher ha kano-kano ka thaiñ ne ka ri.
Ha kano-kano ka jaka pule kaba ïoh ïa ka kyrdan ‘Institute of National Importance’ ka ju ïoh jingithuh kaba kyrpang bad don ruh ka bor kaba kham heh bad laitluid nalor ka jingïoh ïa ka jingbei pisa na ka Sorkar Pdeng.
Ka Kong Ampareen ka la ong ba ha kane ka jingleit ïakynduh ïa u Nadda, yn sa khot lang ïa u Director ka NEIGRIHMS nalor kiwei pat ki ophisar na ka bynta ban ïakren bad pynsngew ïa ki mat kiba donkam ban ïoh ka jingkyrshan lang ka Sorkar Pdeng ha kaba ïadei bad ka jingai jingshakri ka NEIGRIHMS ha kane ka Jylla.
Kane ka Myntri ka Sorkar Jylla kan sa pynsngew ruh ha u Nadda halor ka jingdonkam ban pyntreikam noh ïa ka jaka sumar ïa kiba don ka jingshitom bampong (cancer).
Nalor kane, ka Kong Ampareen ka la ong ba ka NEIGRIHMS ka don ruh ka jaka pule doktor Post Graduate ha kaba ka don ka bhah kaba dei jong ka Thaiñ Shatei Lam Mihngi (North East quota) bad ka bhah ha baroh kawei ka ri (All India quota). “Ka NEIGRIHMS ka lah ban ai jinghikai tang 27 ngut ïa mynta ha kaba 12 ngut ka dei bhah jong ka Thaiñ Shatei Lam Mihngi. Kumta kum ka Jylla kaba don ïa ka NEIGRIHMS hangne, ngi kwah ban kyrpad ïa ka Sorkar Pdeng ban ai bhah lem ïa ka Jylla ban ïoh pule doktor (Post Graduate) ban pyntbit ha ki laiñ bapher-bapher kiba ïadei bad ka jingai jingsumar,” la ong ka Kong Ampareen.
Kane ka Myntri kaba la leit kylleng ki jaka sumar bad lap ïa ki jingduna, ka la ong ba ki jaka sumar ha Jylla ki dang duna palat ïa ki doktor kiba la dep pule pyntbit kyrpang (specialist) ha ka rukom ai jingsumar ïa ki jingshitom bapher-bapher bad lada ka Jylla ka ïoh bhah ban phah pule doktor Post Graduate ha NEIGRIHMS kan long ka jingïarap shibun.
Ka la ong ruh lada ki doktor ka Jylla ki ïoh kane ka lad ban leit pule biang ban pyntbit kyrpang da kaba pyndep ïa ka Post Graduate, kan long ruh ka jingmyntoi khamtam haba pynkhreh ban ïoh ïa ki nonghikai ha ki jaka pule doktor ha kane ka Jylla.
