Shillong, Jylliew 27
Ki paidbah nongshong shnong jong ka Mawphlang, Mawngap bad Marbisu ki la pynpaw ba ki dap da ka jinglyngngoh kaba jur halor ka jingduna ka jingïoh ïa ka umbam-umdih hapoh kitei ki shnong.
Kitei ki nongshong shnong ki la ong ba baroh shikatta ki ju mad ïa ka jingduna um hynrei ym kumba long mynta ba ka jingïoh ïa ka umbam-umdih ka la long kaba duna shaba palat kaba la buh ïa ki nongshong shnong jong kitei ki shnong ba kin shem jingeh shikatdei eh namar ka umbah-umdih ka long kaba ju pyndonkam manla ka sngi ha baroh ki liang.
“Khyndiat kum ban shu pynkynmaw ba kat kum ka soskular (Agreement) kam dei ban don ka jingkyrduh um hapoh ka Hima Mawphlang la kumno-kumno ki dei ban ïoh salonsar ki ban don ha ka, hynrei haba ngi peit mynta ngi ïohi ïa ka jingtyrkhong hapoh jong ki shnong kiba hap hapoh ka Hima Mawphlang”, la ong kitei ki nongshong shnong.
Na ka liang ki katto-katne ngut ki la leit ban peit ïoh lehse ka don ka jingduna um ha ka dam hynrei la ïoh ïa ka jingtip kaba tikna ba kam don satia ka jingduna ne jingrngat noh jong ka um ha katei ka jaka pynlang um.
“Ka jingkylli ka long hato kumba tip baroh shi katta ba ïa ka Mawngap, Mawphlang bad Marbisu la pynbiang tang da ka Umrisaiñ haduh kat mynta hynrei hato balei pat ba ki shnong ki duna um man la ka por?”, la buh jingkylli ki nongshong shnong.
Shuh shuh kitei ki nongshong shnong ki la ong ba ha ki por kiba kham mynshwa kata ha ka por ba dang don u Bah S.K. Sun uba dei u nongmihkhmat jong katei ka thaiñ, kane ka jingkyrduh umbam kam ju don satia namar ka jingtbit jong une u nongmihkhmat ha ka ban treikam. Ym tang katta u la pyndep hi ruh ïa la ka soskular (Agreement) bad la ka Hima hynrei kaba pylla ka long ba mynta wat la ka um kam hiar lane kam duna pynban ki shnong hapoh ka Hima Mawphlang bad Hima Marbi ki la hap ban thied umbam-umdih man la ka sngi.
Kitei ki nongshong shnong ki la ong ba kane ka jingthied umbam-umdih man la ka sngi ka la ktah ïa ka pla tyngka jong ki khamtam hapoh u pud u sam jong ka Hima Mawphlang, ki dang don shibun ki longïing-longsem kiba duk bad ki bym kot bor satia wat ban thied ïa ka umbam-umdih.
“Hooid, ïa uba don pisa kam don ka jingsngewpher hynrei ïa u bym don pisa ka jingktah kan don beit namar ban shu sei pisa man la ka sngi kam dei kaba suk. Ngi hapoh u pud jong ka Hima Mawphlang, ngi dang don shibun ki longïing kiba duk bad ki bym kot bor wat ban thied um, kumta kan shem jingeh shibun ïa ki ban long kum kiwei pat kiba ïoh ba kot”, la ong kitei ki nongshong shnong.
Kitei ki nongshong shnong ki la ong ba kane kam dei shuh ka juk ban kit khiew ne kit tin ban leit tong um na wah bad mynta ka long kaba eh ruh ban ïoh leit kit um na wah namar ki wah ki la duna bad kaba kham sngewsih shuh-shuh ka long kum ïa kito ki longïing jong ki riewkynthei ki bym don shynrang ban ïarap ban rah um ïa ki na ki pung shnong ne pung dong lehse kiba mad ïa ki jingeh kum ka pang ka shitom kan shem jingeh shibun ïa ki.
“Katkum ka skhim jong ka sorkar pdeng kaba la tip kum ka Jal Jeevan Mission lane JJM kaba la bhah ban pynpoi um sha man kawei-pa-kawei ka thliew ïing briew, hato hangne ha ngi kata ha Mawphlang, Mawngap bad Marbisu kam pat treikam? Lada kam pat treikam, ngi shu kwah ban kylli tad haduh lano kan sa treikam noh bad lada ka lah treikam, ngi kwah ïa ka jingpynshai katno tylli ki longïing ba la dep ban ïoh ïa kane ka umbam-umdih?”, la buh jingkylli kitei ki nongshong shnong.
Kum ki nongshong shnong jong kitei ki thaiñ ki la ong ba kim kwah ban shu sngap ïa kaei kaba u paidbah u donkam namar kane ka dei ka kam ïap-kam im hapoh ki shnong, bad ki la kyrpad jur ïa ka tnad PHE khamtam hapoh Mawphlang, Mawngap bad Marbisu ba kan shimkhia lem ïa kane ka kam khnang ba kan pynsuk ïa shibun ki nongshong shnong khamtam ïa u kup shiliang u sem shiliang.
