Shillong, Jylliew 27
Ka pung Umïam ka la kham kiew sted mynta u snem 2024 lada ïanujor bad u snem 2023 namar mynta u snem ka lah ban dei ba ka jingwan kloi u slap bad ka jingïoh bun u slap, katba mynshem snem pat ka slem ban wan u slap.
Katkum ka jingai jingkheiñ ka tnad MeECL ha jaka ba ju pynïeng hajan ka jingkieng Umïam mynta ka sngi ka 27 tarik Jylliew 2024, ka jingkiew jong ka um ka la poi haduh 3197.30 phut kaba la jan tap ruh ïa ki kynroh kiba la paw khyndew harud jong ka pung Umïam.
Katba u snem 2023, ka Umïam ka poi tang 3186.33 phut haduh ka 22 tarik Jylliew 2023.
Kum ban shu pynkynmaw ka jingduna u slap mynshem snem ha Shillong ka la pynlong ïa ka Umïam ban tyrkhong kat haduh ba ha u bnai Jymmang ka surok rim ka la paw rong bad paw ruh ki jaka shongkai, hynrei dei tad haduh ban da kut u bnai Jylliew ka Umïam ka la sdang ban dap biang ynda la wan u slap.
Katba mynta u snem shwa ban kut u bnai Lber 2024, u slap u la wan hap bad bteng ha u bnai Ïaïong, Jymmang haduh mynta u bnai Jylliew kaba la pynlong ïa ka tnad MeECL ban pynduna ïa ka jingpynlip bording.
