Shillong, Jylliew 27
U Deputy Inspector General of Police (Eastern Range) u Davis NR Marak u la ong ba ka tnat pulit ka la pynkhlaiñ bha ïa ki lad pahara ha ïingbishar Meghalaya High Court nalor ha kiwei pat ki jingtei kiba kongsan jong ka Sorkar ha Jylla.
Kane ka jingpynkhlaiñ bad pynjanai ïa ki bor pahara, ka long hadien ba ka ïingbishar Meghalaya High Court ka la ïoh pdiang haduh ar sien ïa ka shithi lyngba ka ’email’ ba la byrngem ban pynbthei bom, kata ka sien ba nyngkong ha ka 6 tarik u Kyllalyngkot, 2024 bad ka sien ba ar ha ka 18 tarik Jylliew, 2024.
“Ngi la phah ïa ka kynhun pynlip bom (bomb squad) jong ngi ban pynshisha ïa kane. Hynrei, ka paw ba kane ka jingbyrngem pynbthei bomb ka dei kaba thok. Namarkata, kam shym la don satia ka jingujor ejahar ha kaba ïadei bad kane,” la ong u Marak haba ïakren bad ki lad pathai khubor ha ka Sngi Palei.
Shuh shuh u la ong, wat la ym shym la don eiei, hynrei na ka liang ka tnat pulit ka la shimkhia ha kaba ïadei bad ki bor pahara ha ka High Court bad ruh ha kiwei ki jingtei ba kongsan jong ka sorkar.
“Ha ka jingshisha, ngi la dep ban ïakren ruh la katto katne sien ha kaba ïadei bad ka jingpahara ïa ki jingtei ba kongsan bad ngi la shimkhia bha ïa kane ka kam,” la ong u Marak bad bynrap ba ka kam ba ïadei bad ka jingshngaiñ bad jingpahara kan dei kawei na ki mat ba kongsan bha, ka ban ïakren ha ka SP-Cos Conference ka ban sdang naduh lashai ka sngi ha Police Headquarter.
“Ngi la dep ban ïakren ïa ki lynti kumno ban pynkhlaiñ bad pynjanai ïa ki jingpahara hapoh ka High Court bad ïa kine baroh ngin sa ïakren kham bniah shuh shuh ha ka jingïalang ban long lashai ka sngi,” u la ong,
