Shillong, Jylliew 27
Ka tnat ka koit ka khiah jong ka Sorkar Jylla ka la shim katto-katne tylli ki rai ki ban ïarap ban kham pynbiang ïa ka jingshakri ha ka liang ka koit ka khiah ha ki jaka sumar kiba don ha kylleng ka Jylla.
Haba ïathuh ïa kane, ka Myntri ka tnat ka koit ka khiah, ka Kong Ampareen Lyngdoh ka la ong ba ha ka jingïalang bad ki ophisar bad doktor ban khmih ïa ka jinglong-jingman ki lad jingsumar ha Jylla, la ïakren shibun ki bynta ki ban ïarap ban pynbha ïa ka jingai jingshakri.
Ka la ong ba napdeng ki rai kiba la shim, ka long ban pynkhlaiñ ïa ki jaka sumar hynrei ha kiba bun ki khep, hap ïakynduh mawsiang namar ka jingduna briew kiba ai jingshakri ha ki jaka sumar bad ka jingduna ki doktor kiba la kham shah hikai pyntbit.
Hynrei la ong ba ka jingdkoh ka dei ruh ka jingbym don lypa ka jingmang ban thungkam haba plie ïa ki jaka sumar kiba thymmai. Kumta la rai ba haba pynmih ïa ki jaka sumar kiba thymmai, dei ban plie noh bad dei ban don lypa ka jingmang ban thungkam.
La rai ruh ban khmih lut ïa ki ïing jaka sumar kiba la kham rim bad kiba la don kham bun phew snem khnang ban maramot bad pynbha ïa kum kita kiba kynthup ruh ïa ki jaka sah jong ki doktor bad ki nongtrei.
Sa kawei pat ka rai kaba la shim ka long ban nym bankhia ïa ki doktor ha ki jaka sumar da kaba bynshet ban peit sa ïa kiwei pat ki kam ophis hynrei donkam ban aipor ïa ki doktor ban peit ha ka liang ki lad ai jingsumar ïa ki paidbah, bad ban pyllait luid ïa ki.
“Nga la ong ïa ki ophisar ban kyrpad ïa ka Sorkar ban thungkam da kiwei pat ki briew ki ban shimti ïa ki kam ym ban bankhia ïa ki doktor da kiwei pat ki kam nalor ki lad ai jingsumar ïa ki briew kiba wan sha ki jaka sumar,” la ong ka Kong Ampareen.
Ka la ong ruh ba ka tnat ka koit ka khiah ka ïoh bha ka jingai mynsiem na u Myntri Rangbah bad ka Sorkar hi baroh kawei ha ka rukom ai jingshakri ha ka liang ka koit ka khiah bad kumno ban nang pynkhlaiñ bad ai jingkyrshan ïa ki jaka ai jingsumar jong ka Sorkar kiba don ha kylleng.
Shuh shuh la rai ruh ban ithuh kyrpang ïa kito kiba la ai jaka sngewbha sha ka Sorkar ban tei ïa ki jaka sumar bad ka tnat ka koit ka khiah kan peit ïa kane ban ai burom ïa kiba la kyrshan ïa ka Sorkar khamtam ban ai jaka sngewbha. Ka la ong ba ka jingburom ka lah ban long da kaba ïakut ha ka liang ka jingthungkam na kato ka longïing kaba la ai jaka sngewbha.
