Jowai, Jylliew:
Ka Society for Urban and Rural Empowerment (SURE) ha ka 25 tarik Jylliew ka la pynkup burom ïa 13 ngut ki briew kiba don jingduna ha ka bor ïohi ki khmat kiba la pyndep ïa ka jingshah hikai na ka bynta ban thaiñ bad shna ïa u synsar.
Ïa kane ka jinghikai la kyrshan da ka Meghalaya State Skill Development Society (MSSDS) bad ka tnat District Social Welfare, Jowai, ha ka shnong Moosakhia, kaba hap hapoh ka Amlarem Block bad Lumbhah Dakha Wahïajer, kaba hap hapoh Thadlaskein Block.
Ïa ka jingïalang pynkup burom la pynlong ha SURE Training Centre, ha ka jingdonlang ka Additional Deputy Commissioner, West Jaiñtia Hills District ka Kong DV Lyngdoh, District Social Welfare Officer, West Jaintia Hills ka Kong R Passah, u District Skill Development Officer Bah Lambor Suchen nalor kiwei kiwei.
La sam syrnot bad ki tiar ki tar ne start up kits kumjuh u white cane bad kiwei de ki tiar ïa kiba la ïarap lyngba ka tnat DSWO sha baroh 13 ngut kiba la pyndep ïa ka jingshah hikai.
Ka Durka Sari kawei na kiba shah hikai, kala ïathuh ba ka lah ban pynmih shibun ki synsar bad ïoh ruh ban die da ka jingïarap ki paralok. Katba u Krishna Phawa u la ïathuh ïa ka jingmyntoi bad jingkyrshan ba u la ïoh lyngba kane ka jingshah hikai.
Ha kane ka juh ka sngi ka Kong DV Lyngdoh kala plie paidbah ruh ïa ka SURE Training Centre kaba don ha Loomsooiung Newhill, Jowai.
Ïa ka jingïalang la pynïaid da ka Kong Aitilut Kyndait bad la donlang ruh u Secretary ka SURE u Bah HH Mohrmen, ka Kong Ilasiewdor Gashna, Project Director jong ka SURE, bad Pasqualina Lamare na ka SURE.
