Shillong, Jylliew 27
Ka Myntri Sorkar kaba khmih ïa ki kam rep, ka Kong Ampareen Lyngdoh kan rah sha u Myntri ka Sorkar Pdeng namar ki don katto-katne ki jingeh kiba donkam ban pynsuk ïa ki nongrep ban ïoh ïa ki skhim rep.
Ka Kong Ampareen ka la ong ba kan sa ïakren bad u Myntri ki kam rep ka Sorkar Pdeng ha kaba ïadei bad ka PM Kisan namar ka don ka jingpynsngew ba ki nongrep ki shem shitom wat ban pynrung kyrteng ban ïoh myntoi na kane ka skhim.
Ka la ong ba ki rukom treikam kiba lah ban biang bad ïahap ha kiwei ki jylla lehse kim long kiba ïahap bad kane ka jylla ha kaba donkam ban pynbeit bad kham pynsuk.
Ka Myntri ka la ïathuh ba ka Sorkar Jylla ka la pynïaid shakhmat ïa ka rukom ai jingïarap ban kyrshan dor ïa ki mar rep bad ïa kane kan sa ïakren ruh bad ka Sorkar Pdeng ban kyrshan ïa ka Jylla na ka bynta ban kyrshan ïa ki nongrep.
Ka la ai nuksa ha kaba ka Sorkar Jylla ka la buh ha ka mang tyngka ban don ka Corpus Fund ban kyrshan dor ïa ki nongrep ha kaba ïadei bad ki mar rep khamtam haba tad eh ka dor.
