Nongstoiñ, Jylliew 27
Ki runar bym lah ban tip ki dei kiei la suba ba ki la wiang ding ïa ki 3 tylli ki kali jong ka kompeni shna surok na Delhi, ka Joint Stock Company Industrial Association ha ka shnong Ladweitang ha West Khasi Hills.
Kane ka la jia ha ka step jong ka Sngi Palei ha ka por 4 baje eiei, ha ka jaka ba la pynïeng ïa kitei ki kali kaba don markhap bad ka jaka ki nongtrei ka kompeni ha shnong Ladweitang West Khasi Hills.
Katkum ka jingïathuh jong ki manager katei ka kompeni la ong ba ha ka por kumba 4 baje mynstep eiei jong ka 27 tarik, ki la ïohsngew ïa ka jingsawa na ka jingpah ki ‘central locking’ jong ki kali bad mar-mar ki la ïa mih na ki jaka sah ha katei ka jaka bad ïohi ïa ka jingkem ding jong ki kali, ha kaba mar-mar ki la ïaleh ban tem bad kham hadien katto-katne ki la lah ban pynlip noh ïa ka ding bad ym shym la don ba mynsaw lait noh tang ka jingjulor.
Nalor kane ki la ïathuh ruh ba nalor jong kitei lai tylli ki kali, kawei ka JCB lane ka puh shilum ruh kaba don ha ka surok Nongstoiñ-Kynroh ha ka shnong Mawthungkper, ka la shah thang dusmon.
La ong ruh ba ka jingduh na kane ka jingshah leh dusmon ka la kot sha 1 klur tyngka eiei.
Shuh shuh la ong ruh ba halor kane ka jingjia, na ka liang jong ka kompeni ka la dep ruh ban leit buh ïa ka jingujor ha thanat Nongstoiñ.
Halor kane ka jingjia, na ka liang jong ki pulit ka district ki la pyntip ba ki la dep ban pynrung mukotduma bad ka jingtohkit bad ban thwet ïa ki briew ba donkti ka la ïaid shakhmat.
