Shillong, Jylliew 28
Ka tnat Road Transport and Highways ka Sorkar Pdeng ka la pynpaw ka jingsngewkhia bad diaw ha kaba ïadei bad ka rukom shim jaka ha Meghalaya na ka bynta ki projek shna surok, bad lada ka jingshim jaka kam poi katkum ba thmu, ki projek ruh ki lah ban shah pyndam noh.
Ïa kane ka Sorkar Pdeng ka la pynpaw ha ka jingïakynduh hapdeng u Myntri Rangbah u Conrad K Sangma bad u Myntri ka tnat Road Transport dang shen ha New Delhi.
U Conrad u la ïathuh ba ha ka jingïakynduh jong u bad u Myntri, ka la don ka jingïakren shaphang ka rukom shim jaka bad ka jingslem ban ïoh ïa ka jaka ban shna ïa ki surok.
U Conrad u la ong ba u la batai ba ki don ki projek kum ka Western Bypass ha kaba ka jingshim jaka ka la poi kumba 90 na ka 100 bad la jan dep lut ban shim jaka.
U la ong ba ka tnat ba dei khmih jong ka Sorkar Pdeng ka la ban bha ïa kane ka mat namar ka eh shibun ban pynsted ïa ki projek lada ym pat ïoh lut ïa ki jaka.
U Myntri Rangbah u la ong ruh ba na ka liang ka tnat ka la ong ba lada don ki bynta jong ka projek ki bym pat ïoh lut ïa ka jaka dei ban nang sdang noh ïa ka projek.
Hynrei u la ong ba na ka liang ka Sorkar Pdeng ka la pynpaw ba lada don ki jingeh ban ïoh jaka, ym lah ban shu ap bad yn poi u pud ba ki projek kin shah pynduh noh pynban.
Kumta u Myntri Rangbah u la kyntu ïa ki nongshong shnong ban ai ka jingïatreilang na ka bynta kane namar ka jingdon ki surok kiba biang ka long ka jingmyntoi ïa ki nongshong shnong.
U la ong ba ka Sorkar Pdeng ka shimkhia ruh ha kaba ïadei bad ka surok four-lane naduh Lad Umroi sha Jowai ter ter Ratacherra bad shaduh Silchar ha kaba ka jinglut kan kot sha ka T. 20,000 klur.
U la ong ba ïa kane ka projek ruh ka jingshim jaka kan sa nang ïaid bad yn leh katba lah ban pynsted ïa ka kam.
