Mawkyrwat, Jylliew:
Ka Myntri ba khmih ïa ka tnat ka koit ka khiah ka sorkar jylla, ka Kong Ampareen Lyngdoh ha ka Sngi Balang ka la hiar ban leit jurip dalade ïa ka PHC ha Mawthawpdah bad ïa ka Sub-Centre ha Shngimawlein ban sakhi da la ki jong ki khamt ïa ki jingduna hapoh kitei ki jaka ai jingsumar.
Kane ka jinghiar jurip ka Myntri ka la long ruh hadien ba ka HYC Mawthawpdah Area Unit hapoh ka jingialam u samla Boneyface Shangpliang ka la leit ïakynduh ïa ka Myntri ha Shillong ha ka 13 tarik u Jylliew 2024 halor ka jingduna ki doctor bad ki nurse hapoh ka PHC Mawthawpdah, South West Khasi Hills District.
Ha katei ka jingjurip, la ïadonlang u Bah Renikton Lyngdoh Tongkhar MLA ka Mawkyrwat Constituency, u Bah Carness Sohshang, MDC, Bah Kitborlang Nongrem, President NPYF, ki Doctor, Nurse, ki dkhot ka HYC Mawthawpdah Area Unit bad ki paidbah nongshong shnong.
Ha katei ka sngi na ka liang ka Synjuk Ki Rangbah Shnong Area Mawthawpdah lem ka Seng Samla Shnong Shilliang Um ki la ïoh ban ai ïa ka dorkhas ha ka Kong Ampareen kata ban pynbun shuh ïa ki doctor, ki nurse bad kiwei kiwei ki nongtrei ha ka PHC, ban mamamot noh ïa ka building bad ban pynbiang bording ilektrik bad ka um ha baroh ki Sub-Centre kiba hap hapoh katei ka PHC bad kiwei kiwei ki jingdonkam.
Ka Synjuk ki Rangbah Shnong lem SSSS Shiliang Um ki la buh ka jingkyrpad ïa Kong Ampareen kaba peit ruh ïa ka tnat ka rep ka riang ba kan thawlad lem ban kyntiew ïa ka kam ri jingi bad ïa ka rep ka riang kaba ki paidbah kane ka dong ka thaiñ ki im ha kane ka kam.
Ka Myntri haba ai jingkren sha ki lad pathai khubor hadien ka jingjurip ka la pynpaw ba ka jingwan jong ka ban jurip ka dei halor ka jingud jingnam ki paidbah.
Ha kaba ïadei bad ka jingdawa jong ka HYC, ka Synjuk ki Rangbah Shnong Area Mawthawpdah bad ka SSSS Shilliang Um Zone kaba ki mat jingdawa ki long kumjuh, ka Myntri ka la kular ba kan sa shimkhia katba lah ban pynbiang ïa ki jingduna hapoh kine ki jaka sumar ha ryngkat ka jingïatrei bad u MLA ka thaiñ.
Ha kajuh ka por ka la buh ka jingkyntu ïa ki paidbah ba kin ai ka jingïatreilang khamtam ki longkmie ba ki dei ban pyndonkam ïa ki sub-centre ban leit kha ïa ki khyllung bad ban ai ïa ki tika bad kiwei kiwei.
Ka Kong Ampareen ka la kular ba na ka liang ka sorkar kan sa ïaleh katba lah ban pynbiang ïa ki jingdonkam hapoh kitei ki jaka sumar bad hadien arbnai kan sa wan biang ban jurip ban pynthikna ba kin long kiba la bit la biang.
Ha kawei pat ka liang, ka HYC Mawthawpdah Area Unit ka pynpaw ïa ka jingaikhublei kyrpang ïa ka Myntri kaba la shah skhor ïa ka jingkyrpad jong ka seng bad ka kyrmen skhem ruh ba lyngba ka jingwan jngoh jong ka Myntri ïa ka PHC ki mat jingdawa jong ka seng kin sa urlong bad long kiba seisoh.
