Shillong, Jylliew 28
U Nongïalam ka National People’s Party (NPP) u Conrad K Sangma, u la ong ba ki paralok lane ki seng saiñpyrthei kiba ïatreilang hapoh ka lama jong ka Meghalaya Democratic Alliance (MDA) ki la kular ba kin don beit haduh kaba kut jong ka samoi treikam.
Haba kren sha ki lad pathai khubor halor ka jingmih khubor ba la mih ka jingkynnoh ïa ka NPP na ka jingbym lah lehbha ha ka ilekshon MP da ki seng kiba donlang hapoh ka Sorkar MDA, u Myntri Rangbah u la ong ba na ka liang jong u kum u nongïalam ka kynhun MDA u la kren ïa ki nongïalam jong baroh ki paralok kiba donlang hapoh ka MDA bad ki paralok MDA ki la ong ba ka jingïatreilang kan bteng bad ka Sorkar kan pyndep ïa ka samoi treikam haduh kaba kut san snem.
Kumta u la ong ba lehse ki don ki shimet kiba pynpaw da kumwei pat ïa ka sur hynrei na ka liang ki nongïalam jong ki seng kiba don hapoh ka MDA kam don kano kano da kumwei pat.
“Baroh ki seng saiñpyrthei kiba ïatreilang ki la pynpaw ha nga ba kin bteng beit ban ai jingkyrshan, bad ngin pyndep ïa ka samoi treikam jong kane ka sorkar,” la ong u Myntri Rangbah.
