Nongpoh, Jylliew:
Ka shlem treikam jong ka District School Education Officer (DSEO), Ri Bhoi District lem bad ka District Project Co-ordinator ka SSA (SE) jong ka Ri Bhoi District, da ka jingsngew sarong bad jingkmen, ki la ïoh ban pynkup burom ïa ka heprit Naphisabeth Daisy Syiemlieh, kaba dang shong ha ka Klas IX ha Byrwa RMSA Secondary School Sumer. Ïa kane ka jingpynkup burom, la pynlong ha shlem treikam jong ka DSEO ha Nongpoh.
Ka jingshah pynkup burom ka heprit Naphisabeth ka dei hadien ka jinglah jong ka ban wan ha ka kyrdan ba ar jong ka ïakob kyntip (Quiz competition) kaba la wan ban ïashim bynta da kumba 2 lak ngut ki khynnah skul na kylleng jong ka ri India bad ïoh ruh ban ïashim bynta ha ka Young Scientist Programme bad lah ban shna ïa u Rocket.
Ka Kong Paidolyne Lyngdoh Nonglait, DSEO ka Ri Bhoi ka la ïathuh ba kane ka jingpynkup burom ka dei hadien ka jingleit ïashim bynta jong katei ka heprit ha ka ïakob kyntip bad ïoh ïa ka kyrdan kaba ar bad ruh ban ïoh pat ban leit ïashim bynta sa ha ka Young Scientist Programme bad lah ban shna ïa u Rocket, kaba long ka nam bad ka burom kaba khraw.
Ka Kong Paidolyne ka la ai ruh ka kitbok-kitrwiang ïa ka heprit Naphisabeth ba kan dang lah ban trei minot bha ha ki jingpule ki jong ka, bad kyrmen ruh ba kan sa lah ban long kum kawei ka Scientist bakhraw jong ka ri. Ka la ai khublei kyrpang ruh ïa ki nonghikai kiba la trei shitom bad pynshlur ïa ka heprit Naphisabeth ban ïaid shakhmat ha kum kine ki jaid prokram.
Haba ïoh pat ban ïakren bad ka heprit Naphisabeth, ka la pynpaw ïa ka jingsngewkmen ba napdeng ki 2 lak ngut ki khynnah pule jong ka ri, ka la shah jied sha katei ka Young Scientist Programme bad pynpaw ruh nalade shimet hi kam kwah satia ban long Scientist, hynrei ka kwah ban long kum ka ophisar jong ka Indian Administrative Service (IAS) hadien habud.
