Shillong, Jylliew
U Myntri ka tnad Social Welfare, Bah Paul Lyngdoh u la ong ba ym don kino-kino ki kam pynroi, ka jingpynlut ha ki kam jngoh kai pyrthei ne tnad surok kiba lah ban poi sha ka thong lada baroh ki sienjam ki phai khmat lut ha ka ban wanrah ïa ka jingdonkam na bynta ka pateng jong kiba kyrni ha ka jingdih drok bad kyiad.
“Kaba mut, kam myntoi ban don Sorkar ne ka rukom pynïaid ha ka synshar-khadar,” la ong u Myntri.
U Bah Lyngdoh u la ong ïa kane haba ai jingkren ha ka ‘Multi-stakeholder Symposium’ ban rakhe ïa ka ‘International Day Against Drug Abuse and Illicit Trafficking 2024′ ha Vivanta Shillong, ba la pynlong da ka tnad Social Welfare hapoh jong ka Drug Reduction Elimination & Action Mission (DREAM) ha ryngkat ka jingïasnohktilang bad ka Indian Drug Users’ Forum bad Meghalaya Users’ Forum.
U la ong ruh ba ha kane ka kynti, bun ngut kiba la don bynta ha ka prokram; kaba kdew ba ki nongshong shnong ki la nang jan sha u pud jong ka jingsngewthuh.
U la ong ruh, “Ka Meghalaya ka la jam sha ka jingsngewthuh ba ngi donkam ban kiew bad kyntiew ïa ka jingïadon bynta jong ngi halor ka jingeh jong ka jingkhaïi bad jingpyndonkam drok, ka long ka jingpynkynmaw ba ka imlang-sahlang ka don ka lad ban jied la ka kwah long ka nongjop ne ka lanot jong ki jinglong-jingman.”
Ha kajuh ka por, u la ong ba die ban kiar na ka jingkynnoh iwei-ïa-iwei, hynrei dei ban long kiba laitluid ban kdew ïa ki jingthylli bad jingduna.
“Ka long kaba donkam ïa ngi baroh ban shim ïa kane kum ka jingïakhun lajong. Nga kyrpad ïa baroh ki kynhun seng bad ki nongïalam niam ban buh jingmut na ka por sha ka por ba ka lawei jong ka Jylla, ka lawei jong ka pateng ban wan ka don ha ki,” u la ong.
U Myntri u la kdew ruh ba ka Jylla kum ka Punjab – kaba ‘riewspah shi kat dei ha ka liang ki khun samla, ka sap ka phong, ha ka liang ki kam ïalehkai, ka shah teh shah khum pat ha u drok.
U Bah Lyngdoh u la pynkynmaw ruh ba shisien ka por, ka Jylla ka la long tang kum ka lynti ïaid jong u drok bad ki jingpyndih pynbuaid hynrei ïa mynta, u drok u la poi sha baroh ki kyndon-kynshrot jong ka Jylla.
“Ngi ïakhun ïa ka jingma kaba lah ban pynjot-pynpra shi syndon ïa ka imlang-sahlang,” u la ong.
Shuh shuh u la bynrap ba ka Sorkar ka buddien ïa ki briew ba donkti ha ki kam be-aiñ bad dei namar kane ka daw ba ka jingdon jong kiba la koit bad ki jingkhynra ka la kiew bha.
