Shillong, Jylliew 28
Ka National Testing Agency (NTA) ha ka Sngi Thohdieng ka la pynbna ba ïa ka eksamin University Grants Commission National Eligibility Test (UGC NET) yn pynlong hapdeng ka 21 tarik Nailar bad ka 4 tarik Nailur, 2024, bad ïa kane ka eksamin yn pynïakhun da kaba pyndonkam da ki kor ki bor lane kata ka Computer-Based Test (CBT), bad ym shuh da kaba pyndonkam da ka kot sada bad u khulom.
Nalorkata, la pynbna ba ïa ka eksamin CSIR NET yn pynlong hapdeng ka 25 bad 27 tarik Naitung, 2024. Kine ar tylli ki eksamin ki long kiba donkam bha na ka bynta ki samla kiba kwah ban long ki nonghikai (Lecturer) bad kiba kwah ban long ki nongwad bniah (Research Fellowship) ha ki skulbah bad kiwei pat ki shlem.
Ha kajuh ka por, ka NTA ka la pyntip ba ïa ka All India Ayush Post Graduate Entrance Test (AIAPGET) 2024 yn pynlong beit ha ka sngi kaba la buh mynshwa, kata, ka 6 tarik Naitung.
Lah ban kdew ba ïa ka eksamin UGC-NET 2024 la pynlong ha baroh kawei ka Ri ha ka 18 tarik Jylliew. Hynrei tang hadien shi sngi, la pynbna ba la hap ban pyndam noh ïa kane ka eksamin na ka daw ba ki la don ki jingleh tuh kiba ktah ïa ka jingïaid beit bad jinglong khuid jong ka eksamin. Ki la don palat 9 lak ngut ki samla kiba la ïakhun ïa kane ka eksamin.
Ha kine ki sngi, ki kynhun jong ki samla pule ki la pynlong da ki jingïakhih ha kylleng ban pyrshah ïa ki jingkynnoh ba ki la don ki jingbym ïaid beit ha ka eksamin NEET-UG bad ka jingpyndam ïa ka eksamin UGC-NET.
