Shillong, Jylliew:
Kum ka jingrakhe ïa ka ‘International Day Against Drug Abuse and Illicit Trafficking’ bad ka ‘Nasha Mukt Bharat Abhiyan’, ka tnad Customs ka la pynlong ïa ki prokram ai jingtip bad ruh ka jingpynduh ïa ki drok ba la ïoh kurup ban pyni shuh-shuh ïa ka jingkut jingmut jong ka ban ïaleh pyrshah ïa ka jingpyndonkam bad ka jingshalan ïa u drok.
Kum ban shu kdew hangne, shi taïew shuwa, kata ha ka 26 tarik Jylliew, 2024, ka tnad Customs ka la pynlong ïa ki prokram ai jingtip ha Kendriya Vidayalaya GC, Agartala, Government Boys Higher Secondary School, Dhubri bad ha Govt. Chawnpui High School, Aizawl da ka jingthmu ban ai jingtip ïa ki khynnah skul shaphang ki jingma kiba wan na ka jingpyndonkam ïa u drok, ka jingkongsan ban im ka jingim kaba koit ka khiah bad ka jingkiar na u drok.
Ka tnad Customs ka la pynlong ïa ki prokram ai jingtip ha KRIPA Foundation De-Addiction Centre for Children, Shillong bad New Hope De-addiction-cum-Counselling Centre, Shillong ha ka 25 bad 26 tarik u Jylliew, 2024.
Ïa ki kamram bad ki sienjam jong ka tnad la pyni bad ka la don ruh ka bynta bad ka Dr. Jasmine M. Lyngdoh, Clinical Psychologist bad Director, Routes, Shillong ha kaba la ïakren shaphang ka jingktah jong ka jingdih drok, jingdih kyiad bad la ai jingmut ruh shaphang ki lad ki lynti ban lait na kane ka jingkyrni.
Ha kajuh ka por, la sam ruh ïa ki tiar ïalehkai sha ki nongpang ban kyntiew ïa ka koit ka khiah jong ki.
Ha ka sienjam ban pyni ïa ka jingïeng skhem pyrshah ïa ka jingkhaïi drok, ka tnad Customs ka la pynlong ïa ki prokram ban pynduh ïa ki drok ba la ïoh kurup ha Assam, Manipur, Meghalaya bad Mizoram.
Ha kane ka prokram, la pynduh noh ïa 12.48 kilo u ‘Heroin, 45.27 kilo ki kuli drok Meth/Yaba, 5804.78 kilo u kynja bad 66728 bilor ki dawai jyrhoh ba don ‘Codeine’ kiba kot lang sha palat T.167.47 klur.
Ïa kane ka kam la leh ha ka rukom kaba shngaiñ bad ka bym ktah ïa ka mariang da kaba pyntikna ba kine ki mar ba pynsniew kin ym don lad ban pynïaid ïew shuh.
Shuh shuh ka tnad ka ïeng skhem ha ka kam jong ka ban ïada ïa ka imlang-sahlang na ki jingma kiba wan na ka jingpyndonkam bad jingshalan ïa u drok.
Da kaba pynlong ïa kine ki prokram ai jingtip bad ka jingpynduh ïa u drok, ka tnad Customs ka thmu ban pynduna ïa ka jingpyndonkam ia ki drok bad ruh ban ai jingkyrshan ïa ki sienjam ha kylleng ka pyrthei ban ïaleh pyrshah ïa ki kam khaïi drok.
