Shillong, Jylliew 30
Ki shipai ka 193 Bn jong ka BSF-Meghalaya ha ka Sngi U Blei ki la ïoh bat ïa 3 ngut ki nong Bangladesh -Mohibur Rehman (30 snem ka rta), Kudus Miah (25 snem ka rta), na Sunamganj distrik, bad uwei uba dang 16 snem ka rta, nongshong shnong ka Sylhet distrik, na Bangladesh kiba la wan rung sha India lyngba ka East Khasi Hills District.
Hadien ka jingïoh jingtip ba tikna, ka kynhun BSF kaba ha Lai-Lad Dangar ka la pynsangeh ïa ka kali Maruti Alto bad namar ka jingsuba, ka la bat noh ïa 2 ngut ki nongkhaïi be-aiñ ka India bad 3 ngut ki nong Bangladesh.
Haba kylli tohkit ha kaba sdang, kitei ki nong Bangladesh ki la kam ba ki la rung tuh sha India da ka jingthmu ban leit wad kam sha Kashmir.
Ïa kitei kiba la shah bat, la aiti noh sha thanat Dangar, East Khasi Hills ban leh ïa kaba donkam.
