Shillong, Jylliew 30
Ka National People’s Party (NPP) ka la lah ban leh bha ha ka ilekshon ba dang shen sha ka Urban Local Body (ULB) ha Nagaland, ha kaba ka la lah ban jop ha 5 tylli ki ‘Ward’ ha Dimapur Municipal Council (DMC) bad Kohima Municipal Council (KMC).
Ka risol kaba la pynbna ha ka 29 tarik mynta u bnai, ka kdew ïa ka jingnang kiew ha ka jingkyrshan bad jingshaniah kaba ka NPP ka ïoh na ki paid nongthep ‘vote’ ka Nagaland.
Ki kyrtong ka NPP kiba la jop ha katei ka ilekshon ki kynthup ïa ka Nikali Sumi Chophi, kaba la jop na Ward No. 10 bad u Jonathan Yepthomi, na ka Ward No. 23 jong ka DMC.
Ha Kohima, la nang pynkhlaiñ shuh-shuh ïa ka ktem jong ka seng da ka jingjop u Vizokhoto George Kirha na Ward No. 14, ka Aneü Khaming na Ward No. 16, bad u Mr. Medoviu Martin Suohu na ka Ward No. 19 jong ka KMC.
U National General Secretary ka NPP, u James P.K. Sangma, uba khmih ïa ka ilekshon ULB na ka liang ka seng, u la pynpaw ka jingkmen halor ka risol jong ka ilekshon.
U la ong, “Kine ki jingseisoh kim dei tang ki jingjop ïa ka seng, hynrei na bynta uwei-pa-uwei u nongshong shnong uba ïohi jngai ïa ka Nagaland kaba roi ba kiew. Ngin ïaineh bad kane, da kaba pyntikna ba ki sienjam jong ki ba ïadei bad ka roi ka kiew ki long kiba kynthup lang bad kiba pyni dak.”
U la pynpaw ruh ka jingsngewnguh sha u State President ka Nagaland lem bad baroh ki MLA ka NPP hapoh ka Jylla, dkhot ka State Executive, Mahila bad Youth Wing, Minority Cell, lem bad baroh ki dkhot ka seng kiba la trei minot ha ka jingïalap ilekshon sha ka ULB.
Na ka liang u National Youth President ka NPP, Bah Nickey Nongkhlaw u la ban jur halor ka jingdonkam jong ka jingïashim bynta lang jong ki samla ha ki kam saiñ pyrthei bad ka roi ka kiew ha ka imlang-sahlang.
U la kdew ruh ïa ka bynta ba kongsan jong ka Youth Wing ka seng ha kane ka ilekshon.
“Ka jingjop jong ngi ha kine 5 tylli ki ‘Ward’ ka kdew shai ïa ka jingkylla ba bha bad ka bor bathymmai kaba ki samla nongïalam ki wanrah. Ngi trei shitom ban kyntiew ïa ka basa saiñ pyrthei ka ban ai mynsiem ïa ki samla ban ïashim bynta bad pyndonkam ïa ki buit thymmai jong ki na bynta ka jingmanbha jong ka seng bad ka Nagaland,” u la ong.
