Nongpoh, Jylliew 30
Ha kawei ka jingjia ïatyngkhuh kali mynta ka step, uwei u nongñiah ‘Scooty’ u la mynsaw jur hadien ba u la kum leit tynrah ïa u ‘post’ dewbilat uba don harud ka surokbah National Highway-6 ha Umsning, Ri-Bhoi District.
Ïa kane ka jingjia la pyntip sha ki bor thanat ka Umsning ha ka por kumba 10:40 baje mynstep.
Katkum ka tyllong khubor na ki bor pulit ka thanat Umsning, la ïathuh ba utei u nongñiah ïa uba la tip kyrteng kum u Bah Hilarious Syiem (44 snem ka rta) na ka shnong Mawïong Tariang B jong ka East Khasi Hills District u la ngat ha katei ka jingjia katba u dang leit phai sha nongbah Shillong na Nongpoh da katei ka ‘Scooty’ jong u, kaba don ïa u nombor ML-05-Z -7656.
Na ka liang ki bor pulit, ki la pynkit noh mar-mar ïa utei u rangbah uba la thiah lyngktar ha surokbah khlem tip briew shuh, sha ka CHC Umsning na ka bynta ban ïoh jingsumar kaba kyrkieh lyngba ka kali kit nongpang jong ka 108.
Shuh shuh, la ïoh jingtip ba namar ka jingjur jong ka jingmynsaw, ïa utei u rangbah, la pynkynriah noh sha ki jaka ai jingsumar ha nongbah Shillong na bynta ban ïoh ïa ka jingsumar kaba paka ha ryngkat ka jingdon lang jong ki bahaïing bahasem, katba ïa katei ka ‘Scooty’ kaba la julor bun, la rah noh sha thanat Umsning.
