Shillong, Naitung:
Ka NSSO, Shillong ka la pynlong ïa ki prokram bapher-bapher kum shi bynta jong ka “Swachhata Pakhwada 2024”.
Ka ‘Swachh Bharat Mission’ ka dei ka prokram ba kyrpang jong ka Sorkar India, ba la sdang da u Myntri Rangbahduh ka ri, u Narendra Modi ban pynurlong ïa ka jingangnud jong u Mahatma Gandhi ban pynlong ïa ka India kaba khuid bad suba.
Ka dei ka jingïalap ha kylleng ka ri ba la plie paidbah da u Myntri Rangbahduh ha u 2014 ban pynduh ïa ka jingleit bar pathar bad ban kyntiew ïa ka rukom lum ïa ki ñiut ki ñier.
Ka tnad Statistics bad Programme Implementation ka la pynlong man ka por ïa ka ‘Swachhata Pakhwada’.
Ki bynta ba kongsan ba ka jingïalap ka phaikhmat ka kynthup ïa ka jingsdang jong ki jingpynkhuid ban pyntikna ba ki sawdong-sawkun baroh kawei ki long kiba khuid.
Kum shi bynta jong ka ‘Swachhata Bharat Mission’, ka tnad Statistics bad Programme Implementation ka la rakhe ïa ka ‘Swachhata Pakhwada 2024’ naduh ka 16 haduh 30 tarik Jylliew, 2024.
Ha ki ar taïew, ka NSSO (FOD) Regional Office, Shillong ka la phaikhmat kyrpang ban kot sha ka jingkhuid jingsuba da kaba kyntiew ïa ka jinglong-jingman ha ka ophis.
La pynlong ïa ki prokram bapher-bapher kum ka jingthung dieng ha ka jaka ïalehkai ‘Golf’ ryngkat bad ka jingpynkhuid ïa ki sawdong-sawkun jong ka, ka jingnoh synñiang sha ka Rajasthan Vishram Bhawan, Garikhana da ki jaka bret ïa ki ñiut ba pyut bad bym pyut bad ka jingpynkhuid ha ki bynta jong ka Police Bazar, Shillong bad ki jaka ba marjan.
Kane ka jingïalap kaba 14 sngi ka la long kaba jop bad ka la don ka jingïashim bynta shitrhem da baroh ki ophisar bad ki nongtrei jong ka shlem treikam NSSO (FOD) RO Shillong da ka thong ban pynlong ïa ki sawdong-sawkun jong ka shlem treikam bad ka nongbah Shillong kaba khuid bad kaba lait na ki ñiut plastik.
