Mawkyrwat, Naitung:
Ka KSU Ranikor Circle ka la lap ba ka Puksora Sub-Centre kaba hap hapoh ka Ranikor C&RD Block ka la long kaba jot bad pei namar la sakhi ruh ïa ka jingdap um jong kane ka jaka ai jingsumar.
Ïa kane ki dkhot jong ka KSU Ranikor Circle ki la lap ha ka janmiet jong ka 1 tarik u Naitung 2024 katba ki dang leit shim dawai na ka Puksora Sub-Centre ha kaba ki la lyngngoh ban lap pynban ïa ka jingsangsot jong kane ka jaka ai jingsumar ha kaba ka la don ka jingpei um ha baroh ki kamra jong ka ïing paki barim bad bathymmai.
Ka dkhot ka KSU ki la lap ruh ïa ar tylli ki jingkhang ha katei ka Sub-Centre kim long shuh ban khang ha kaba ka um ka la lah ban ïoh rung katba mon sha ki kamra.
Ha ka video ne dur khih la ïohi ruh ba ki nongtrei ha katei ka Sub-Centre ki la pyndonkam da ka bording ban shet jingshet bad ka jingbteng ban dap um jong kitei ki kamra lehse kan sa wanrah jingmynsaw bad pynwit ruh ïa ka jingtreikam pura jong katei ka Health Sub-Centre.
Kumta na ka liang u samla Marconi Thongni, President ka KSU Ranikor Circle u la kyntu ïa ka Engineering Wing jong ka tnat ka koit ka khiah bad ruh ïa u District Medical and Health Officer jong ka South West Khasi Hills District ban phah peit bad phah maramot mardor khnang ba kan nym buh jingeh ïa ki nongtrei ba dei ban sah ha kane ka jaka bad khamtam eh ïa ki nongwan shim dawai na kane ka jaka sumar.
