Nongpoh, Naitung:
Ka long shisha ka nam bad burom ïa ka Ri Bhoi District bad Jylla hi baroh kawei hadien ba kawei ka longkmie kaba dei na Ri Bhoi District, ka la ïoh ban rah ïa ka nam Mrs. World Peace bad Beautiful Skin jong ka Season 2 Mrs. World International 2024 kaba la pynlong ha Leela Hotels and Resorts jong ka Ambience Mall ha nongbah Gurgaon bad kaba la pynïaid da ka Glamour Gurgaon.
Katei ka longkmie ka dei kaba la tip kyrteng kum ka Pinki Maring bad ka dei ruh kaba ïoh ban rah ïa ka nam Miss Meghalaya kaba nyngkong eh ha u snem 1998. Hadien ka jingwanphai jong ka ha ka Lah Sngi U Blei sha ka jylla, ki bahaïing bahasem, ka Kur Maring ha ryngkat bad ki paralok parajor, ki la leit ban pdiang burom ïa ka ha ka kad liengsuiñ ha Guwahati, ka Lokapriya Gopinath Bordoloi International Airport.
Kum ban shu kdew, katei ka lympung kaba la pynlong ha ka 1 tarik jong u Jylliew, 2024, la wan ban ïashim bynta haduh 500 ngut ki longkmie na kylleng ki ri jong ka pyrthei bad ka Pinki Maring ka la ïoh ban rung ha ka thup jong 60 ngut kiba ïoh ban ïakhun final kat haduh ba kan ïoh syndon ban rah ïa kitei ar tylli ki nam, kata kum ka Mrs. World Peace bad ka nam Beautiful Skin.
Ki bahaïing bahasem, ka Kur Maring bad ki paralok parajor kiba la leit ban pdiang sngewbha ïa ka Kong Pinki na ka kad liengsuiñ, ki la pynpaw ïa ka jingsngew sarong bad ka jingsngewkmen shikatdei halor ka jinglah jong ka ban ïoh ïa katei ka nam kaba long ka burom na ka bynta ka kur ka jait, ka shnong ka thaw, ka jylla bad ka ri hi baroh kawei.
Katba ka Kong Pinki Maring haba ïoh ban ïakren, ka la pynpaw nyngkong ka jingsngewnguh sha U Blei Uba la don ryngkat ban ïalam bad btin lynti ïa ka haduh ba ka la ïoh ban rah ïa katei ka nam. Ka la ai khublei kyrpang ruh ïa ka kmie u kpa, ki bahaïing bahasem bad kumjuh ruh ïa ka Kur Maring kiba ju kyrshan ïa ka na ka por sha ka por.
Ka khubor kaba ka Kong Pinki Maring ka don ban sam sha ki paidbah ka long ba lada ki don kano-kano ka jingthmu ha ka jingim ka jong ki, kim dei satia ban pynlehnohei ïa kata ka jingphohsniew ka jong ki, hynrei ba kin ïai trei shitom bad trei minot ban pynurlong ïa ka da kaba ong “Lada ma nga, nga lah ban pynurlong ïa ka jingphohsniew ka jong nga, khlem pep ma phi ruh phin lah ban pynurlong ïa kata ka jingphohsniew ka jong phi.”
