Shillong, Naitung:
Haba pynkynmaw biang ïa ka jingkular jong ka ban pynkup bor ïa ki samla lyngba ka ‘Skill Development’, ka Dalmia Bharat Foundation (DBF), ka Corporate Social Responsibility (CSR) jong ka Dalmia Cement (Bharat) Ltd (DCBL) ka la wanrah ïa ka ‘Course’ thymmai halor ka ‘Domestic Data Entry Operator’ ha ka Common Service Lab (CSL) ha Lumshnong, Meghalaya.
Haba jubab halor ka jingduna ha ka liang ki jingdonkam jong ka ‘Skill Development’ ha ki jaka kyndong jong ka East Jaiñtia Hills, ka DBF ka la wanrah ïa kane ka ‘Course’ ban pynbiang ïa ki sap ki phong ba donkam na bynta ka jingïoh kam sha ki samla ha ki jaka nongkyndong.
Ka kynhun sdang kaba kynthup ïa 28 ngut ki samla, ha kaba 75% ki dei ki kynthei, kin hap ïaid lyngba ïa ka jingshah hikai kaba paka bad bym donkam siew eiei.
Ki sap ki phong kiba ïoh pdiang na kane ka ‘Course’ la khmih lynti ban pynurlong ïa ki jingdawa jong kane ka kam.
Ha katei ka sngi la sakhi ruh ïa ka jingïalang na bynta ka kylla ba 12 jong ka ‘Digital Literacy Course’, ha kaba la sam ïa ki syrnot sha 20 ngut ki samla. Ha kane ka jingïalang, la wan ïashim bynta da u Vinay Kumar Mishra, Head, HR, DCBL, Meghalaya ha ryngkat ka jingdonlang u Jitumoni Kalita na Dalmia Bharat Foundation.
“Ka Dalmia Bharat ka ïai neh ha ka jutang jong ka ban kyntiew ïa ka ‘Skill Development’, bad ka lad kamai kaba neh hapdeng ki imlang-sahlang ha ki nongkyndong jong ka Meghalaya bad ka Thaiñ Shatei Lam Mihngi,” la ong u Raju Ranjan Prasad, Unit Head – Meghalaya, DCBL.
Haba kren halor katei ka sienjam, u la ong “Haba khmih bniah halor ka jingkiew ki kam ba ïadei bad ka ïoh ka kot bad ki kam khaïi ka roi ka par ha ka thaiñ jong ngi, ngi ithuh ïa ka jingdonkam na bynta ki sap ki phong kiba kyrpang. Kane ka prokram ka thmu ban pynkup bor ïa ki samla jong ngi, khamtam ki kynthei da kaba pynbiang sha ki ïa ka jingai jinghikai kaba paka khnang ba kin manbha ha ki ïew ka ïoh kam ïoh jam, da kaba kyntiew ïa ka ïoh ka kot bad ka roi ka par ha ka imlang-sahlang. Ngi kyrmen skhem ba kane ka prokram kan plie lynti na bynta ka jingjop, ban pynwnadur ïa ki ‘riew shimet ba i don lad kiba long la kloi ban synñiang sha ka jingshakri.”
Ka Common Service Lab (CSL), ka sienjam jong ka DBF ka pynleit jingmut halor ka ‘digital literacy’, pynkupbor ïa ki samla ban kyntiew ïa ka sap ka phong jong ki ha ka liang ka ‘digital’ bad kam pisa, nalor kiwei.
Naduh ba la pynïeng ïa ka ha Lumshnong, ka CSL ka la don ïa ka bynta ba kongsan ha ka ban tyrwa ïa ki ‘Digital and Financial Literacy Course’, da ka jingthmu ban pynduna ïa ka jingthylli haba phai sha ka bynta ba ïadei bad ka ‘digital’ hapdeng ki khun samla. Palat 200 ngut ki samla ki la ïoh jingmyntoi ha ka liang ki sap ki phong lyngba kine ki prokram.
